موجوع يا قلب والوجع دايس
لا منه بيخرج ولا هو عايز
بحاول أخبي وعامل ناصح
تفشل محاولة فـ أقوم وانا يائس
تضحك بنية شايفة الدموع نازلة
وتشاور لأمها وتقول عيل تايه
تنزل في الأرض راسي حتة نزلة
للأرض باصص ورقبتي محنية
وأقول في نفسي : محدش حاسس
موجوع يا قلب على حبيبة خاينة
وعدتني وخلت بيا وسط الطريق
أدور عليها .. اختفت .. مش باينة
سابتني وحدي بتلفت عليها
سابتني عامل زي الغريق
طيب ليه بتوعد بنظرة عينيها
مادام الوعد حمل تقيل
مالأول تعرف قلبي الحكاية
كنت هسحب وأعمل صديق
موجوع يا قلب على صديق راحل
عايش بس في كون غير الكون
موجود بس هو عنك متشاغل
عاوزه ومش عاوزك وين ما تكون
يطلبك .. تفرح وانت شايف رقمه
تسمع صوته تقوله واحشني يا غالي
يقولك : كلبي عنده "واوا" في ودنه
وانا عشانه متأثر ومشغول بالي
يا خسارة وقت ضاع في صحبة
من طرف واحد وضاع التاني
موجوع يا قلب على صديقة ذكية
حبتها من أول يوم شوفتها
حبتها لأنها بجد نقية
كان واضح جدا يوم ما قابلتها
طب ليه تسيبني .. إيه اللي فيا
مفيش ايد بتسقف لوحدها
الإختلاف وارد بس بحنية
طب إزاي أصالحها وأرجعلها
موجوع يا قلب على حب فاشل
بس أجمل ست في عصرها
حب صعب وقولت أحاول
ومستحيل كنت أوصلها
كلام كتير جوايا شايل
وفرحت إني رايح أقولها
أخدت صدمة ورحت راجع
من طرف واحد .. قلبي حبها
موجوع يا قلب على بلد ضايعة
قلنا الأمل نثور ونغير
روحنا لمينا الشباب الصايعة
وعملنا ثورة جميلة وتحير
مات مننا زهور لامعة
منهم كبير ومنهم صغير
سقط الغول ونزلت دمعة
فرحنا وقولنا الحال اتغير
طلع عسكر عالسجون وزعنا
ووقف وسط الثورة يتصور
والشعب قال الجيش بتاعنا
والثوار دول شباب مغرر
على باب السجن كان وداعنا
يا مصر انسي .. كان غيرك أشطر
آآآآآآآآآآآآآآآآآآآآآآآآآآآآآآآآآآآآآه
موجوع يا قلبي وانت السبب
انت الل عامل دة كله في نفسك
عجيب ولا يعجبك العجب
ومشيل حالك فوق طاقتك
من فينا بيحب الوجع
والوجع عندك كيف لعقلك
ومال أمي أنا بالقلق
لا أنا ناقصني ولا أنا اللي ناقصك
يا قلبي كفاياك مش قادر بقى
خللي فيه شوية لو عندك
واعقل وارسى وهدي اللعب
وبطل عِند أنا عارف عِندك
تعالى نتصالح وانسى الحرب
وكفاية دة كله عشت لوحدك
يالا وقول نويت على ايه
متبخلش عليا بإجابتك
هو سؤال مصمم عليه
وانا قاعد مستني سيادتك
إنجزززززززززززززززززززز بقىىىىىىىىىىىىىىىىىى
ليست هناك تعليقات:
إرسال تعليق