في مثل هذا اليوم

في مثل هذا اليوم منذ عشرة أشهر

حدثت النكسة

إنطفأت الشموس تاركة الكون في ظلام حالك

إستيقظ القلب على فراغ قاتم

بلا ألوان

في مثل هذا اليوم

قدمت قلبي قرباناً في محراب الإنسانية

ووضعته على المذبح المقدس

فصعد صعود المسيح إلى ربه

في مثل هذا اليوم

تلقى قلبي صاعقة البعث

فقام من مرقده يترنح كالسكارى

ناظراً للكون بعيون طفل وليد

يرى ولا يدرك غير ألوان باهتة

في مثل هذا اليوم

تركتني الحياه للخلود

أسير بخطى حائرة .. حالمة

تائهة في حلمها .. سارحة

في مثل هذا اليوم .. الثامن والعشرون من كل شهر

تغرد شموع الحزن السوداء

أسمع صوتها من دولابي الكئيب

فاليوم ميعاد خروجها الشهري

أوقد الشموع فترسل ظلالاً على جدران الأوهام

أو ترسل الظلام على نور الأحلام

يتحسر قلبي بفرحة وهو ينتظر قرار الإعدام

للمرة العاشرة .. على التوالي

في مثل هذا اليوم .. الثامن والعشرون من كل شهر

أتذكر مآساتي .. وأرثي نفسي عندها

وأوعدها .. أنها الأخيرة

آخر ذكرى كئيبة

في حياتي .. الجديدة

موقف لا يمكن السكوت عنه أبداً

في يوم من الأيام وأنا راجع من بني سويف ورايح القاهرة وكنت راكب وسيلة مواصلات من مستحدثات الحضارة "العفنة" تسمى ب"الميكروباظ" وصادفني الحظ أنني جلست بجانب رجل تقي وورع "ماشاء الله ماشاء الله" ويتألق وجهه ويشرق بعلامة الصلاة الغائرة في جبينه المسطح "ماشاء الله ماشاء الله" وبجانبه "كيفما ظننت" زوجته المنتقبة "ماشاء الله ماشاء الله" ويبدو أنها أسرة صغيرة سعيدة في طاعة الله .. ونظرت للطفلة الجميلة التي يحملها "إبنته" وهي "ماشاء الله ماشاء الله" ترتدي الحجاب الشرعي الكامل "والكمال لله وحده" على الرغم من أن عمرها لم يتجاوز العامين بأي حال "ماشاء الله ماشاء الله"

جذبني هذا المشهد المروع وجعلني أحمد الله وأثني عليه وأشكر فضله علي ونعمته أن أطال بي العمر كي أرى هذا المشهد البديع فقبّلت يدي "شعرٌ ولحية" ثلاثة مرات وتيقنت بأن النصر قادم لا محالة ببركة هذه الطفلة المحجبة

ولكن فجأة نزلت ببصري إلى قدم الطفلة وفوجئت بكارثة .. رأيت مشهد إقشعر له بدني وذاب له جلدي وتساقط بسببه شعر "باطي"

الطفلة يا إخواني كانت "أستغفر الله العظيم" تلبس بنطال جينز أزرق اللون "ولا حول ولا قوة إلا بالله العليّ العظيم"

كيف وعندها فقط عامان من العمر وتلبس البنطال الجينز الأزرق .. أمال بكرة لما تكبر تلبس إيه .. جينز أحمر ؟؟ .. وتشتغل رقاصة ..؟؟

وهنا إخواني فهمت المخطط كله

فنظرت إلى والدها شذراً "وقد طارت علامة الصلاة من جبينه" ولسان حالي يقول : ثكلتك أم بنت خال حماه عم جارتك .. خسأت وخسأ آباؤك وأجدادك وكل الليبراليين والعلمانيين الكفرة أمثالك دعاه الحرية والإباحية والجنز

وحينها إخواني .. أدركت أن النصر لسة فاضل عليه كتيييييير "حوالي 200 كيلو كدة" وعلمت أن هذا كله بسبب ذنوبنا وأعمالنا .. فإستغفرت الله وتفيت عن شمالي تلات تفات وحمدت الله أنه عصمني من هذه الخلفة العار

------------------

ملحوظة هامة

أحداث هذه القصة حقيقية وقد وقعت في يوم الإثنين الموافق الأول من شهر سفر لعام ألف وربعمائة وثلاثة وثلاثون بالتقويم الهجري الإسلامي المبارك والموافق السادس والعشرون من شهر ديسمبر لعام ألفان وإحدى عشر بتوقيت الفرنجة الكفار الملاعين

إنشرها من أجل نصرة دينك ولك الأجر

واحد بعتها لعشر أصدقاء قام ربنا بعتله فلوس كتيرة مُلة

واحد تاني نفضلها ومبعتهاش لحد ربنا غضب عليها صحي تاني يوم لقى شعر سدره وقع كله ومبقاش يطلع تاني

أيهما تفضل ؟؟

فلوس كتيرة مُلة

أم سدر أملس فُلة

أنا لو منك أختار الفلوس

Life .. حياه

الحياه بحر وفيها أنا بحار

أخوض أمواج ورياح وصقيع وأمطار

والبحار أنواع وأشكال وألوان

فهناك الصعب والسهل والشجاع والجبان

غير أن بحري المفضل أسموه بالحنان

وقد عشت فيه دوما حتى طواه النسيان

ألفت طقسه وأملت طول الزمان

شدوت حباً وعزفت أعذب الألحان

مليت دفئاً ودوما شعرت بالأمان

ألهبت شوقاً ولسعتني منه النيران

لبثت دهراً وليته ظل إلى الآن

ولكنها الدنيا .. عذاب وتيه وخسران

وهناء ورغد عيش في بعض الأحيان

هي حياه واحدة سأعيشها بكل المعان

مسترخ على أريكة أو محارب في ميدان

وأمض بها كل وقت وأحياها في أي مكان

Fever ... حمى

في مرضي .. تراودني الهلاوس

أنام فأحلم وأصحى على هاجس

أغمض عيناي فأراها باسمة

أستشعر منها لمسة حانية

أفيق وأبحث عن ملاكي الحارس

فأجد نفسي في ظلام دامس

كريشة في طاحونة أدور

وصوت الرحى يطحن البذور

وظلي يسير في طريق معاكس

أقف وسط الخلق بدون ملابس

أفيق مجدداً والحيرة تملأني

ولازال الظلام هائجاً .. يغرقني

أتحسس قدمي فأجد اليابس

وعلى مرمى بصري ألف فارس

ترتفع السيوف فتهبط على صدري

فألملم جراحاتي وأقوم فـ أجري

تنظر كلاب الطريق ولا تؤانس

ويضيق القلب بصدري الحابس

أقوم مفزوعاً على صدى مدوي

لطرقات صارمة على باب قلبي

أتحسس بكفي قلبي البائس

وأفكر في حالي بعقل ناعس

أفيق أخيراً وألتفت حولي

أتحسس رأسي أجدها تغلي

أنظر لحالي !!!!

مشفقاً

ولساني حالي

أيناها ؟؟

أشتاق جداً لرؤياها

ولمسة على جبيني

من نعومة يداها

وكلمة : سلامتك يا حبيبي

ساحرة من بين شفتاها

أيناها

وأنا وحيد في مرضي

وكيف أنساها

وأنيسي الوحيد ضعفي

مابال الطب بمداواتي ؟؟

ومن الآن ينفعني ؟؟

عزيزي

دعك من تلك الدواءات

فـ علتي هنا في قلبي

وإن كنت تفكر في علاجي

فقد تركته على دربي

وأخذه شخصاً غيري

فدعني أموت وحدي

خواطر 1

صراخ القلوب لا يُسمَع

وأنين الحنين .. لا يُشعَر

وهمس الحبيب .. لا يُمنَع

وصراع العقل .. لا يُعقَل

ألا لي بنظر من قلب

ألا لي بضوء من درب

أتظل الأحزان كافيتي

وهل تنتهي الحرب

أشعر بالثوران داخلي

وأشعر بالحنين .. قاتلي

والخيال في العقل قائم

ودوام الواقع حائلي

في عقلي تدور الكلمات

ومن قلبي تفور الذكريات

ولهيب المشاعر المضرم

يحرق الآن ويترك ما فات

أيا زمن للسماح

وأيا نفس للبراح

وأيا دنيا للتروي

وأيا حي عالكفاح

كل سنة وانا متفائل

اليوم عيد ميلادي

أول عيد ميلاد ليا بعد الثورة

وبعد ميلادي من جديد

أنا اليوم أقدر أقول إن مصطفى بتاع زمان مات بجد

إنهاردة .. أنا مصطفى جديد

عاوز أعيش .. عاوز أفضل عايش فترة طويلة

كانت أمنية حياتي قبل كدة إني أموت

دلوقتي حبيت الحياة

التفائل ملاني بجد

كنت بتمنى أموت لأن الحياة بالنسبة لي كانت كلها شقاء وتعب .. واكتشفت بعد كدة اني انا اللي كنت معيش نفسي الشقاء دة

أول ما ابتديت أستمتع بحياتي وأعرف فعلا طعم السعادة .. مبقتش عاوز أموت .. على العكس .. بقيت عاوز أعيشها أطول فترة ممكنة .. وأستمتع بكل ما فيها

الحياة فيها كتير معشتهوش .. ليه أموت وأنا معشتهاش كلها ؟؟

الأرض دي مش هنرجعلها تاني .. النفس اللي بيروح مش بيرجع تاني

منهجي الجديد .. عيش كل لحظة بلحظتها

خد من الأشياء ما يكفي ليجعلك سعيد .. وإرمي في الزبالة أي حاجة تعكنن عليك

عيش الفرح كله .. وعيش الحزن بالقدر اللي يجعلك إنسان

الناس كانت بتكتبلي زمان في التهنئة بعيد ميلادي .. عقبال 100 سنة .. كنت بقول ان 100 كتير .. واني عاوز أنجز بسرعة

دلوقتي بقيت بتضايق لو لقيت حد كاتب أقل من مليون سنة

استمتاعي بالحياه بدأ معايا من قرار إني مش هحرم نفسي من أي حاجة وخصوصاً اللي حرمت نفسي منه قبل كدة

وفعلا بقيت بقدر كل لحظة في حياتي .. بستغل كل لحظة في إني أمتع نفسي

أنا مش عاوز أرغي كتير .. بس بحاول أوصف اللي جوايا .. واللي جوايا كبير قوي

إنهاردة 23 يوليو 2011

إنهاردة عيد ميلاد مصطفى سعيد الرابع والعشرون

لكن هو في الواقع الميلاد الحقيقي لمصطفى الجديد .. مصطفى الإنسان

أتمنى لكم حياة كبيرة سعيدة مليئة بالتفائل .. مليئة بالحياه

ظلمنا الجاموسة

الشمس قفلت وأنا عالشط قاعد

من أول اليوم بغني ظلموه

يا ترى فعلا ظلمتك جامد

ولا فعلا ديك أهلي طلعتوه

لاموني الناس لما قولت جاموسة

ولاموني عالحمار وأبوه

وإزاي تشبه بني آدم ببهايم

ونظرتهم مستغربة إزاي سابوه

------------

والله انتو كمان بهايم

يعني هي جات عليا

متعرفوش اللي حصل فيا ؟؟

بس إنت معاكم حق

قولت عيلها جاموسة

وإنها بتاكل بسبوسة

عطيتها عذر كبير

والعذر مش بتاعها

مشت في جنازة القتيل

وهي قاتلاه بدراعها

------------------

قولت عنها جاموسة

مغلوبة على أمرها

وقولت عنه حمار

غصبها عن رأيها

وأتاريها حرة عادي

ومقضياها لنفسها

مفيش مشاكل خالص

بتحبه .. وبيحبها

أتاريني ظلمت الجاموسة

لما بيكي شبهتها

عالأقل الجاموسة أوضح

وصريحة باللي في قلبها

شبهتها بيكي علشان أنصفك

لكن رجعت بعد ما شوفتها

دي أحسن من عشرة زيك

ولا شيء يقلل من شأنها

لما قولت يوم بحبك

دلوقتي ندمت إني قولتها

هكمل حياتي بعدك

واللي مش عاجبه يقابلني عندها

جاموسة

كإنسان بحب الحياااااااه

أحب أشوفها في كل حاجة

وفي مرة شوفت جاموسة

كانت بتاكل بسبوسة !!

على غير كل الحيوانات !!

صرخت وقولت يااااااه !!

جميلة .. ماشاء الله

لكن إيه الي جابها هنا ؟؟

وسط القرف والفضلات ؟؟

وهي علشان جاموسة !!

تفضل عايشة محبوسة ؟؟

وملهاش زكريات ؟؟

ولا راحت ولا جات ؟؟

خدت بإيد الجاموسة

ونفضت عنها الآهات

قولتلها أجيبك عندي

وأعيشك وسط أهلي

وأنسيكي اللي فات

فرحت الجاموسة

وقالتلي أخيراً هعيش !!

بدون إلتزامات

وهكون زي العروسة

بزفة وأغنيات

وأبعد عن الحظيرة

ومشاكلها الكتيرة

والنمل والحشرات

قولتلها وعد مني

تكوني روحي ودمي

وفي قلب حياتي تكوني

أميرة الأميرات

قالتلي بس فيه مشكلة

كبيرة ومستعصية

قولتلها وأنا قدها

مهما كان حجمها

قالتلي المشكلة مش فيك

المشكلة في صاحب الجاموسة

قولتلها أرضيه وأريحه

وفوق دماغه أديله بوسة

قالتلي دة عنيد

وطالب طن حديد

ويكون من عز أكيد

قولتلها وماله بشاي ؟؟

بيدي مع الحديد باكو شاي

قالتلي عز الأغلى

واللي إسمه أشهر وأعلى

قولتلها سيبني ليه أفهمه

وأرسيه وأعقله

وروحت لصاحب الجاموسة

قولتله السلام عليكم

قالي إيه اللي جابكم !!

إتصدمت .. بس سديت وداني

قولتله جاموستك عاجباني

وبجمالها شاغلاني

وعاوزها عندي في بيتي

قالي وانت ودنك مش طويلة ليه ؟؟

قولتله أفندم !! تقصد إيه ؟؟

قالي مش شايفلك ديل !!

ولا سرج ولا خيل !!

أمال انت جيت ازاي ؟؟

قولتله جيت في تاكسي حضرتك

لحد ما أجيب الكاريتة بتاعتي

وأبقى أشوفلها خيل

وأركبلها الديل

قالي مش فاهمني

قولتله طيب فهمني

قالي إنت .. فين ديلك ؟؟

وفين خيلك ؟؟

قولتله وإيه علاقة دة بالجاموسة ؟؟

قالي إزاااااااااااااااااي !!!!!!

جاموستي أكبر جاموسة في الحظيرة

ولازم مزادها يطلع على قناة الجزيرة

ونجيبلها برسيم من عند أبو ليلة

قولتله أجيبلها زي ما تحب

قالي متقدرررررررررش

قولتله إشمعنة !!

قالي معرفففففففش

قولتله كدة مينفعش

لازم تديني إجابة

قالي عندك في التلاجة

قولتله خليك جد شوية

قالي إنت كمان بتشتم

طيب روح وإنت ......

وهرش في راسه شوية

قولتله كنت هتقول "طالق" ؟؟

راح قايل .. وبصوت خارق

يا أخي مش عاوزينك

مش قابلينك

خلي عندك دم

وريحنا من الهم

وسيبنا في حالنا

وعلى فكرة

أنا في حمار مكلمني عليها

وصراحة مريح بالنا

هيدفع فيها طن حديد

وهيبنيلها حظيرة

من أجود أنوع الجريد

ومقدمها 200 شوال تبن

ومؤخرها سماد من نوع فريد

قولتله بس هي عاوزاني

وبروحها شارياني

وميهمهاش الحديد

ولا الجريد

قالي ها

دي جاموستي أنا

وملهاش تعوز

ولا حتى تفكر

أنا بس اللي أقرر

قولتله بس دة حرام

تغصبها على دة كلام

قالي وانت مال أهلك

هي جاموستي ولا جاموستك ؟؟

وأنا هديها للحمار

غصب عنها وعنك

مشيت وأنا مذهول

دة مش بني آدم

دة أكيد غول

وروحت للجاموسة

قولتلها كلمي صاحبك

إقنعيه برأيك

قالتلي مقدرش

أخاف يضربني

ويبهدلني ويعذبني

قولتلها طيب والحمار ؟؟

حياتك معاه .. مش دمار ؟؟

قالتلي أهون عليا النار

لكن ما باليد حيلة

دة أنا حيالله جاموسة

ومشكلتي .. كل مشكلتي

إني أكلت البسبوسة

ماله البرسيم ؟؟

ما هو كل البهايم بتاكله

وهما متكيفين

يا ريتني ما شوفتك

ولا حتى عرفتك

كنا فضلنا مرتاحين

من هنا ورايح خلاص

أنا هركب الساقية

وانت اركب ميكروباص

وإرجع لبلدك

وإرجع لأهلك

وأنا هرضى بالحمار

أصلنا واحد

وتوبنا واحد

حتى الحظيرة اللي منها

هي اللي انا منها

إحنا الإتنين بهايم

الأصل واللون .. والجناين

لكن إنت .. بني آدم

وخسارة تاخد جاموسة

روح مصر المحروسة

هتلاقي أحلى عروسة

تليق بيك .. وتفخر بيك

أما أنا .. فلا يليق بي

سوى حمار الحظيرة

ولقد باعني صاحبي له

وسأعيش حياتي معه

حتى نهاية الحياااااااااااااااااه

فاصل ونواصل

…………………
………………….
……………………. مش عارف أبدأ إزاي
بس الفترة اللي فاتت كانت أصعب فترة في حياتي
وتقريبا لسة متجاوزتهاش
مش تقريباً .. دة أكيد
بس بحاول
وهمتكم معايا
……………..
اللي عاوز أقوله
إن حمادة اللي فات كوووووووم .. وحمادة اللي جاي كوم تاني خااااااااااااالص
الفرق بين حمادة القديم والجديد
إن القديم كان عايش لغيره فقط
حمادة الجديد بقى بيحاول إنه يعيش لنفسه ولغيره .. علشان الدنيا تتوزن
وطبعا الكلام دة مش هيجي بالساهل
التوازن ومسك العصايا من المنتصف مش حاجة سهلة خاااااااالص
بعترف إني بعاني من إضطراب في الفترة دي
باخد قرارات كتيرة متهورة
جوايا كمية كبت بحاول أخرجها .. وللأسف معظم المخرجات بتبقى مش صحيحة
بفش غلّي بطريقة خاطئة
بتخانق كتير جدا
بزعل ناس مني بطريقتي المستفزة في التعامل معاهم
لذلك أنا بقول الكلام دة علشان الناس متزعلش مني
وتحاول تقدر شوية الظروف اللي بمر بيها وتساعدني على تجاوز الأزمة
…………….
حاليا بحاول أبني شخصية جديدة أتلافى فيها الأخطاء السابقة وأضيف إليها صفات جديدة أحاول من خلالها أعوض اللي فات
ومن هذا المنطلق فأنا متبني نظرية إن اللي فات عمره ما هيتعوض .. بس دايماً اللي جاي أحلى
وبناءً عليه .. فأنا مش هفتكر من القديم غير حلاوته .. وهنسى مآسيه
طبعا انا بآمل إني أوصل للمستوى دة لأنه مستوى صعب جدا من الإدراك والوعي
وهرجع وأقول مساعدتكم ليا شئ مهم جدا
لذلك
عاوز أعتبر التدوينة دي فاصلة بين اللي فات كله واللي جاي كله
يا ريت ننسى الوحش من اللي فات ونظل فاكرين الحلو فقط
يا ريت أقدر أعمل الكلام دة بجد
———-
قبل كدة مكنتش بتكلم في السياسة نظراً لأني مكنش ليا أي مشاركة سياسية خالص ودة كان نابع من عدم إنتماء أصلا للبلد ومخلوط بيه خوف من أمن الدولة والأهم والأكبر كان خوفي على مخططاتي القديمة اللي هي باظت فعلا
أما الآن فأنا مشترك في حزب العدل .. وأقدر أقول بكل فخر إني ليا دور سياسي في المجتمع
أما إني أتكلم في السياسة في المدونة فلسة مأخدتش قرار في النقطة دي لأن السياسة متغيرة وأنا لسة في أول الطريق ومش عارف لو كتبت ممكن ألبخ لدرجات كبيرة
خليني ساكت دلوقتي لحد ما أتعلمها أصلا وبعدين أتكلم
المهم .. شعارنا في المرحلة الجاية هيكون

تشويق .. إثارة .. متعة

دعواتكم معانا يا جماعة
معااااااااااااانا ياااااااااااااااااااا رررررررررررررررررب

شهادة

أشهد سيدتي
بقوة ما فعلتي
وبكل ما بذلتي
أشهد لكي وأنا أعلم
ورغم خسارة ما أحلم
بأنك الأنسب والأعظم
أشهد بكل الأيام
أنكي يا أغلى الأنام
كنتي لي كل الأحلام
أشهد يا مولاتي
يا كل ذكرياتي
أن بعدك لن يأتي آتي
أشهد يا سيدة القصر
حبك قد فاق حب مصر
في كل وقت وفي كل عصر
أشهد يا من ملكت قلبي
حبك ملأ وجداني وفكري
ولن أنساه والعمر يمضي
أشهد أن فراقك الأصعب
وأنني سأواجه المصير المتعب
في بعدي عنك وقد كنتي الأقرب
أشهد يا هند بأنك كنتي لي كل شيء في دنياي وأني لن أنساك أبداً وكل ما يأتي لن يعوضني عنك مهما كان ومهما صار
أشهد يا هند أنك لم تقصري في حقي يوماً وأنك كنتي لي خير العون وخير السند في مسيرتي وفي حياتي
أشهد يا هند أنك بعد الله كنتي السبب في إستمراري في الحياة وإستحمال كل الصعاب والمشاق وكنتي سر وجودي
أشهد يا هند أنكي ملكتي قلبي حباً وملأتي صدري من هوى العشق ودا وأن هواكي كان لي كل شيء في حياتي
أشهد يا هند بأن حبك ملأ كياني وفكري ووجداني وأن حبك أبداً لن أنساه مهما كان ومهما صار
أعاهدك يا هند أن وصيتك لي عهد على رقبتي تنفيذه
أعاهدك بأني سأعيش الحياة التي تنميتيها لي والتي حلمنا بها سوياً
أعاهدك بأنني لن أظلم من تأتي بعدك ومن سيقع عليها عبء ومسئولية إستكمال الحياة معي
أعاهدك بأن تستمر الحياة بعدك .. فقط لأنها رغبتك

إستفسار

المرة دي أنا مش هنقل خبرة ولا هتكلم ولا هتنيل على عيني أقول حاجة
أنا بس هسأل سؤال
هل المفروض إني أفضل طبيعي لما شريكي في الحياة يظهرلي (سواء بقصد أو بدون) إن فيه شخص أو حاجة أهم مني ؟
لما يتخانق معايا علشان الحاجة دي أو الحد دة ؟
لما يعمل راس الحاجة دي براسي ؟
لما يتحداني انه هيعملها حتى لو انا مش راضي ؟
لما يظهرلي إنها أساسي في حياته (مع إن المفروض إني أنا الأساسي) وانه ميقدرش يستغنى عنها ؟
المفروض حسبما أعرف : إن أنا اللي المفروض شريكي يعمل الكلام دة معايا
يعني أكون أساسي عنده
يتخانق مع أي حد عشاني
يحط راسي براس أي حاجة
يتحدى أي حد عشاني
ميقدرش يستغنى عني
المفروض ان أنا اللي يعمل كدة معايا
المفروض أنا أكون رقم واحد والباقي بعدي بمراحل
وان مقامي عنده أكبر من أي حد تاني
طيب كان جبهالي واحدة واحدة
كان طلبها بطريقة كويسة علشان مفهمش إن فيه حد أفضل مني
مكنش بالغ في الطلب عشان محسش ان الحاجة دي أهم مني
بالعودة للسؤال .. هل المفروض إني أفضل طبيعي ؟؟
وهل المفروض أتقبل الموضوع دة بشكل عادي ؟؟
وهل أرحب بأي حد انه ياخد مكاني ؟؟
حد يرد عليا قبل ما أتجنن