صيف ولا شتا

الجو محيرني قوي ومش عارفله إتجاه

ألبس شتوي الدنيا تحرر

ألبس صيفي الجو يبرد

ولو قلعت الشتوي بعد ما لبسته هتعيا

وحاجات توجع القلب

إنما وسط دة كله سؤال يطرح نفسه دايما بنسأله لبعض أول كل موسم جديد

بتحب إيه أكتر ؟؟ الصيف ولا الشتا ؟؟؟

وصراحة بقى إجابة السؤال بتختلف حسب كل موسم

يعني في الصيف هتلاقي اللي هيقولك : يا راجل دة مفيش أحلى من الشتا ، الصيف دة قرف

ونفس الشخص هيجي في الشتا ويقولك : برررررررد .. إمتى بقى الصيف يجي

بس صراحة

الموسم دة عرفت إجابة السؤال لما روحت إسكندرية الشتا دي

إسكندرية في الشتا كلها أمطار ونوات واعاصير بس رغم كل دة الجو جميل جدا

رغم الهوا الشديد إلا إنه لذيذ

السقعة في ألكس ليها طعم جميل قوي

علشان كدة ومن موقعي هذا أحب أقول إن الشتا أجمل بكتير من الصيف وخصوصا في ألكس

هيرد عليا واحد وهيقولي طيب وباقي الأماكن ؟

صراحة بقى أنا لقيت إن القصة أساسا بتتوقف على الأماكن والأشخاص نفسهم

ممكن واحد جبلة مش بيحس بالسقعة فالشتا بالنسبة ليه متعة

وممكن واحد العكس خالص بيحب السخونة وبالتالي الصيف بالنسبة ليه قرف

بس تعرفو ؟؟

فيه حاجة كمان

الجو العام

الصيف كله حركة

والشتا كسل ونوم تحت البطانيات

بقولكم إيه

هي بقى أذواق وعمرها ما هتحسم

وسيبوني أذاكر بقى عندي إمتحان بكرة

سلاحف

طال الصمت

كلمات كتبتها من فترة بس مش عارف إيه اللي فكرني بيها دلوقتي وخلاني أحطها على المدونة

بس عموما أتمنى تعجبكم

طال الصمت وطال حتى دنى غروب الشمسِ

مسحت الدمع وقد ظننت أن البكاء ينسي

هموماً أثقلتني ودمرتني وأتلفت حسي

بعد بهجة الصبا وسعادة أيام أنسي

ترى أيوجد في سمراء الوجه ما ينسي ؟؟

آلام ذكريات دامت بين حديثٍ وهمسِ

البسمة رحلت عن شفتي والقلب أضطٌر إلى اليأسِ

حين غدوت وحيداً منتظراً ما تشتاقه نفسي

ظننت فيه دوائي من التصورات والمسِ

فجاء يمشي الهويني كعذراء تسير في العرسِ

ولم أدر بأنه بركان كبير من آلام الرأسِ

فترى بعد كل هذا العذاب أعود كأمسِ ؟؟

البعيد عن العين .. بعيد عن القلب

البعيد عن العين .. بعيد عن القلب

كلمة من أمثالنا الشعبية ال(رائعة) اللي لما بيسمعها الواحد دمه بيفور

أنا هقول اللي فهمته من المثل الأول وبعدين أقول اللي عندي

بعيد عن العين بعيد عن القلب يعني مهما كنت بتحب الشخص دة بمجرد ما بتبعدو عن بعض بيروح الحب

ومن ثم لازم اللي بتحبه يبقى قصاد عينك طول الوقت وإلا هيروح الحب معاه لو راح

دة شرحي للمثل ولا أظن إنه هيختلف كتير مع حد تاني

قد يكون المثل دة صحيح نسبياً لأن مفيش مثل بيطلع كدة وخلاص إلا لو كان ليه أصل

إنما هل البعيد عن العين بعيد عن القلب فعلاً ؟؟

أنا لا أظن

اللي أعرفه وجربته بنفسي إن الواحد لما بيبعد عن الحاجة اللي بيحبها بيبقى دايما بيفكر فيها ومشتاقلها

وهو كلمة إشتياق أساسا معناها إيه ؟

معناها إن الحاجة اللي بتحبها مش قصاد عينك ومع ذلك على بالك وجواك وعاوزها

عندنا مثل عظيم في الموضوع دة

سيدنا محمد صلى الله عليه وسلم فضل يحب السيدة خديجة رضي الله عنها حتى بعد ما ماتت

يعني خلاص ماتت مش مجرد إنها مش قصاد عينه الكريمة

لا .. ماتت ومش راجعة تاني غير في الجنة بإذن الله

ومع ذلك فضل سيدنا محمد بيحبها وبيذكرها أوقات كتيرة

وإحنا كمان في حبنا لسيدنا النبي صلى الله عليه وسلم اللي أصلا مشوفناهوش

يعني مش بس بعيد عن عنينا .. لا وكمان مشوفناهوش أصلاً

ومع ذلك بنحبه وبننصره (طبعاً أنا بتكلم عن اللي الإيمان فعلا عندهم كويس)

يبقى إزاي بعد دة كله يبقى البعيد عن العين بعيد عن القلب ؟؟

We^are^1^Family [We^All1]

إنتشرت في الآونة الأخيرة ألعاب الإنترنت بشكل كبير وفظيع
وصراحة أنا كنت ببص نظرة مش لطيفة للي بيقعد طول الوقت يلعب اللعبة دي وكنت بقول إيه التفاهة دي
لحد ما أخوكم بدأ يلعبها  وهنا بس النظرة إتغيرت

الواحد لما ساب الشغل وفضل فترة قاعد في البيت قعدت أجيب في ألعاب كتيرة وألعب اللعبة دقيقتين وأزهق والنت بقى ممل والواحد مش عارف يقعد يعمل إيه عليه غير إنه يدخل منتدى ويعمل مشكلة مع الإدارة ويطردوه 
المهم إن كان فيه لعبة إعلاناتها مغرقة النت إسمها المصارع (بطل روما) Gladiatus (Hero Of Rome)

عدت عليا كذا مرة بس مفكرتش أدخلها لأن كانت نظرتي في الأول زي ما قولت إنه كلام فارغ وتفاهات
لما الفراغ طال بيا قولت أجربها وعملت أكونت عليها ولعبتها
في الأول إستغبيت اللعبة قوي وحسيت إنها مملة لأن مفهاش مشاهدات اللي بتلعبه إنما كلها عبارة عن تقارير للي بيتم واللي انت مش بتشوفه أساسا
لعبتها شوية وبعدين هجرتها
وبعدين لما زاد الفراغ رجعتلها تاني وكنت كل شوية بكتشف حاجة جديدة
لحد يوم واحد بينزل على اللعبة بإسم Dabour دعاني للإنضمام للنقابة بتاعته
والنقابة في اللعبة عبارة عن حزب أو تجمع لعدد من الأعضاء للتحالف مع بعض في الحروب والصراعات اللي بتحصل في اللعبة
أنا كنت أسمع كتير عن النقابات بس مجرتهاش خالص
ولما قررت إني أدخل نقابته رفضوني لأنهم حطو قرار فجأة قبل ما أدخل بساعة واحدة إن لازم شرفك ميكونش أقل من 10000
وقصة الشرف دي إن ليك نسبة شرف بتزداد كلما دخلت صراعات وحروب
المهم اتخنقت وروحت دورت على نقابة قوية دخلتها
بس حسيت إن الوهم اللي قالهولي دبور مش موجود إن النقابة بيساعدو بعض
كنت حاسس إني في صحرا ومحدش موجود
الرسالة الوحيدة اللي وصلتني من سيد النقابة هي رسالة بيقولي فيها أنا ملاحظ إن تبرعاتك للنقابة قليلة
إنما مفيش تواصل ولا إتحاد ولا أي حاجة خالص
إنما أقولكم على حاجة
أول مرة أحس بلذة اللعبة كان من شوية بس لما دخلت نقابة جديدة تجمعت من خلاصة أحلى أعضاء في اللعبة
نقابتنا إسمها We^are^1^Family [We^All1]
أعضاء النقابة دي حسسوني بالمعنى الجميل اللي كنت عاوز أحسه من زمان
إن اللعبة مش بس للتسلية وإنما كمان للتعارف والمشاركة والتكاتف والتعاون
وأنا أساسا اللي قرى الصفحة الشخصية بتاعتي هيلاقي إن من أهداف دخولي على النت كانت التعارف
أنا شوفت كمية ترحيب من الناس جميلة قوي
أخص بالذكر منهم
superstar
SuperBeko
M7.moda
Gold_Mind
WhiteFace
الناس دي بجد قدرت إنها تستخدم اللعبة بكل إمكانياتها
اللي صمم اللعبة دي مكنش بس غرضه إنه يكسب منها وإلا مكنش عمل قصة العائلة جوة اللعبة ودي مش هتفيده بحاجة أو يمكن تفيده على المدى البعيد بس الغرض الظاهر منها وهو إن التعارف يتم
معظم اللي في اللعبة مركزين بس على الفوز والهزيمة ودي مشكلتنا يا عرب إننا بناخد دايما من على الوش ومش بنكمل إستفادتنا من الحاجة بالكامل
إنما الناس دي بجد إستفادت جدا من كل الحاجات دي وقدرت إنها تعمل شبكة من الأصدقاء داخل اللعبة
كمان أقولكم على حاجة
اللي عملوه دة قد يكون بداية لحاجة كبيرة قوي
بمعنى
اللعبة كل الوطن العربي بيلعبها
لما ننشط فكرة التعارف والعلاقات دي حاجة تساعدنا كوطن عربي في إزالة الخلافات اللي بينا
ومين عالم يمكن دة يوصلنا للوحدة العربية اللي بنسعالها من زمان
ومش بعيدة والله يا جماعة
ممكن لعبة بسيطة زي دي توصلنا فعلا للي بتكلم عنه دة
أنا رغيت كتير إنهاردة سامحوني بس بجد إتأثرت جدا باللي شوفته
لأي تفاصيل تحبو تعرفوها عن اللعبة أنا في الخدمة وأعضاء نقابتنا المحترمين كمان تحت أمركم
وأحب أضيف حاجة أخيرة
إن شاء الله المدونة من إنهاردة بجانب إنها موقعي الشخصي بس كمان هتبقى صفحة نقابتنا الحبيبة We^are^1^Family [We^All1]
وأحلى سلاحف لأحلى نقابة

مصطفى سعيد

اللي يفتكر منكم تدوينة قديمة بعنوان ياكي إشمعنة

http://www.yakyblog.com/?p=12

التدوينة دي حكيت فيها إزاي إني بقيت ياكي مع إن إسمي أساسا مصطفى

وقولتلكم إن الموضوع جايب على عقدة نفسية شوية D: بس مش مجنون والله

من فترة قصيرة لقيت نفسي بفكر في فكر جديد شوية

إسم ياكي دة بغض النظر عن شكل التسمية بس هو أساسا كان هروب من واقع إن مصطفى فاشل فعمل فكرة إنه يلبس قناع إسمه ياكي علشان يخبي فشله ورا القناع ويظهر بإسم جديد وهو ياكي

إنما بعد ما ياكي فشل في أهم حاجة في حياته .. إبتدى الفكر يتغير أو يتعدل وتم إتخاذ القرار بعودة مصطفى سعيد من تاني

ياكي برغم نجاحه الكبير إلا إنه فشل في أهم حاجة في حياته لكن دة ميمنعش إنه يمتلك خبرة كبيرة جدا تؤهله لحاجات كتيرة كبيرة

عشان كدة عودة مصطفى سعيد هتكون ليها أساسات ثابتة وخبرة كبيرة تخليه ناجح بنجاح ياكي بإذن الله

وبعدين صراحة ياكي دة إسم فرافيري حبتين 

المهم إن بإذن الله دلوقتي أنا هعمل إن إسمي الحقيقي اللي بحبه جدا وبعتز بيه جدا يرجع من تاني

دي القصة

ودمتم

معدتش تفرق .. يا ترى فعلا ؟؟

من أسوأ الحاجات اللي بيعيشها الإنسان .. الحيرة
وأقصد بالحيرة اللحظات اللي الإنسان بيبقى واقف على مفترق الطرق ومش عارف يدخل في أنهو طريق

والسبب في دة إن كل الطرق تتشابه .. وهنا تحصل الربكة والحيرة في الإختيار
ولو مكنتش عارف إنت عاوز إيه بالظبط وقتها هيحصلك حاجة من إتنين
يا إما هتفضل واقف مكانك لحد ما تموت متعملش أي حاجة في حياتك
يا إما هتدخل في أي طريق وخلاص ومعدتش تفرق
بس يا ترى هي فعلا معدتش تفرق ؟؟

إترفدت من الشغل .. لولولولولولي

آل إيه .. ومع أول يوم رمضان

أبويا بيصحيني على خبر حلو قوي

قالي : إنت إترفدت من الشغل

طبعا الواحد قايم أصلا مش دريان بحاجة حوليه

قولتله : شغل إيه ؟؟

قالي الشغل بتاعك

قولتله : أحسن .. كدة أنا إرتحت

طبعا هو يقصد شغلي في موبينيل .. بس خلاص دة كان زمان

أناقررت من ساعة ما فشكلت إني هاخد أجازة لمدة سنة مشتغلش فيها

أو أشتغل حاجة كدة من باب التسلية

ومن باب التسلية أنا مسؤول العلاقات العامة ومسؤول تسويق وعضو مجلس إدارة بتوكيل المركز الكندي للتمنية البشرية ببني سويف

والمركز الكندي للي ميعرفهوش بتاع دكتور إبراهيم الفقي

دة غير إن شاء الله في خلال كام يوم هكون مسؤول تسويق بردو في مكانين مهمين جدا في بني سويف ومنها على مصر كلها

ولولا إن سيبت موبينيل فعليا من حوالي شهر أو أكتر مكنتش قدرت أوصل للأماكن دي دلوقتي

وفي الآخر .. مطلوب مني إني أزعل إني إترفدت !!

بدون تعليق

أغلى حاجة عند البني آدم

سؤال يطرح نفسه .. إبه أغلى حاجة عند البني آدم ؟؟

سؤال قوي .. بس شائع

ميخصنيش .. المهم إني متكلمتش فيه قبل كدة .. وهتكلم فيه دلوقتي

أكيد إجابة السؤال دة هي .. الكرامة

سبحان الله .. هي بردو نفس الإجابة اللي عندي

بس من حوالي الشهر أو أقل كانت إجابتي مختلفة عن دلوقتي

لو كنت سألتني إيه أغلى حاجة عندك في الدنيا .. كنت هجاوبك .. الإنسانة اللي بحبها

دلوقتي معدش فيه خلاص .. طبعا اللي قرا الكام تدوينة اللي فاتو هيفهم ليه

المهم هحكيلكم قصة

من حوالي 3 سنين أنا كنت عايش حياتي لكل الناس

كنت أي حد محتاج أو مش محتاج بديله ومش بقول لا

لحد ما عرفت الإنسانة اللي وهبتها حياتي

فأصبح إني مبقتش بدي لحد غيرها

ومشيت كدة لمدة 3 سنين فترة علاقتي معاها

ولما إنتهت علاقتي بيها وقفت

مش عارف أعمل إيه

وهنا بس قررت قرار

أنا هعيش لنفسي أولا ولكل واحد يستاهلها ثانيا

يعني أي حاجة هعملها هتكون لنفسي .. وممكن أعمل حاجة لحد بس حد يستاهل إنه يكون صديق ليا أو إنسان قريب مني

نرجع لقصة الكرامة

كنت وأنا في العلاقة دي بقول حاجة

مفيش كرامة بين البني آدمين وبعضهم في تلات حاجات

أولا الأب والأم

ثانيا الحب

ثالثاً البزنس

لازالت هي نفس كلمتي دلوقتي بس مع بعض التعديل

بالنسبة لعدم وجود كرامة في معاملة الأب والأم صحيحة

والبزنس بردو زي ما هو بس في حالة إنه هيجيب همه

أما الحب فهقف شوية معاه

مفيش مشاكل إن يكون مفيش كرامة في الحب .. بس في حالة واحدة

إما إنك تكون متجوز اللي بيتحبها دي .. أو إن يكون التنازل والتضحية متبادلة ومش من طرف واحد

وصدقني .. لو كنت بتعمل أكتر من الطرف التاني يبقى مفيش توازن في العلاقة وهتقع قريب

لازم الطرفين يدو لبعض بالتساوي

الكرامة لما بنتنازل عنها بتضعف منك .. فمتعملهاش إلا لو كان فيه تنازل قده بالظبط لصالحك

.. للحديث بقية .. إن كان في عمرنا بقية

حلال وحرام

أنا مش فاهم .. ليه أهلنا بيقفوا معانا في الحرام عشرة على عشرة وفي الحلال يقفوا قصادنا
على سبيل المثال الجواز

يعني الواحد ممكن يقعد يكلم في البنت من هنا والأمور تمشي معاه ويخرج معاها والناس تشوفهم عادي
أول ما يجي يتقدملها في البيت يلاقي أبوها عاوز طلبات كذا وأمها عاوزة كذا وخالاتها عاوزين كذا
يعني لو مشينا في الحرام العملية تمشي وأول ما نطلب الموضوع رسمي وحلال .. لا ميصحش .. إزاي يعني
لازم الأمور تتقعد والطلبات تكتر والأدهى من كدة إن المبدأ نفسه يترفض إنك تتجوز واحدة كنت بتكلمها قبل كدة
أمال لو مكنش اللي بيكلمها هو اللي يتجوزها أمال مين ؟؟!!
ولو على الطلبات مفيش مشاكل فيها .. ماهو مفيش حاجة بتيجي بالساهل .. إنما التعقيد لمجرد التعقيد والتحبيط والتيأييس وكل الهبل دة ليه
واحد داخل البيت من بابه وطالب حاجة حلال يبقى بدل ما نساعده نقعد نعقده ونكتر عليه وكمان مهما عمل منقبلش باللي يعمله
على سبيل المثال في التعجيز لما تموت نفسك في الشغل علشان تجيب القرش اللي تتجوز بيه وفي النهاية يقولولك لا إحنا عاوزين واحد مركزه عالي
مركز إيه يا أم مركز .. هو الراجل بمركزه !! .. الراجل اللي يعرف يصون مراته ويحميها
وهي نسبة العنوسة زادت من قليل .. ما هو من القرف اللي بيعملوه معانا دة
ولا إنحراف الشباب .. يعني دلوقتي لما الشاب يطلب حلال ومحدش يديله يبقى أكيد هيتجه للحرام .. والحرام مفيش أسهل منه على فكرة
يعني نعمل إيه طيب
محدش يلوم شاب كان عاوز يتجوز بالحلال وإترفض لأسباب غير منطقية .. محدش يلومه في أي تصرف غبي ممكن يحصل منه

تعديل في حياتي

أنا كنت ناوي أقفل المدونة علشان كسلت إني أمسح شوية بيانات كدة بسيطة
البيانات دي هي ان قصة الحب اللي كنت عايشها إنتهت
أنا لسة بحبها .. بس للأسف مش هينفع أتجوزها
والمشكلة الحالية إني معدش ليا هدف ممكن أكمل علشانه وأصبح إني سيبت الشغل ومش عارف إذا كنت هعرف أعمل حاجة تاني في حياتي ولا لا
دة التعديل البسيط

أجمل الحب

أهلاب وسهلب
وحشتونا يا رجالة .. فينكم من زمان
آل إيه .. شريط تامر الجديد نزل من كام يوم

كنت بسمع في الأغاني اللي فيه شوية فكان فيه أغنية بتقول
“وأجمل حاجة في حبي ليكي إنه إتاخد أفش”
أنا في الأول مأخدتش بالي هو بيقول إيه بس عديت
ولما سمعت الأغنية تاني مرضيتش أعديها المرة دي ورجعت الحتة دي تاني وسمعتها صح المرة دي
أنا يمكن علقت معايا علشان الجزء الأول من الجملة
أنا هشرح اللي فهمته من كلام الأغنية الأول
كلمة قفش دي يقصد بيها بسرعة وعلى غفلة
وبالتالي إنه لما حب البنت دي حبها من أول نظرة
اللي إستوقفني بقى إنه فكرني بحبي أنا
لما كنت دايماً بقول لحبيبتي “عارفة أجمل حاجة في حبي ليكي إيه ؟” .. فكانت تهز راسها : إيه ؟؟ .. كنت أقولها : إنه معرفلوش سبب .. تقولي يعني إيه ؟ أقولها : يعني مثلا واحد يحب واحدة علشان جميلة ساعتها لما جمالها يروح لأي سبب الحب هيروح معاه ولو حبها علشان غنية هيسيبها لو فلست … وهكذا .. علشان كدة أجمل حاجة في حبي ليكي إنه ملوش سبب .. علشان كدة هفضل أحبك لحد ما أموت
ودي كانت نظرية ليا إن أجمل الحب اللي من غير سبب

التجربة الياكوزية

مش اللي في بالكم خالص على فكرة
عييييييييب .. إحنا مش في أوتوبيس يا كلااااااااااب
إمبارح كان آخر يوم في الإمتحانات .. يعني خلاص أخدت الأجازة

يا فرحتي
يا ريت كنا فضلنا في إمتحانات على طول
دلوقتي هنرجع للشغل والقرف والهم من جديد
بس هنعمل ايه ماهو لازم

أما قصة التجربة دي فالقصة كلها إن أهلي سافروا يغيرو جو ولأول مرة أقعد لوحدي لمدة 4 أيام
كانت تجربة بجد مثير جدا
أولا أنا كنت حابب إني أريح أعصابي شوية من الدوشة ودة حصل
ثانيا كنت بعتمد على نفسي في كل حاجة .. لو كلت بغسل المواعين .. لو شربت بملا الأزايز .. لو وسخت حاجة بنضفها بنفسي
ثالثاً كسرت حواجز كتييييييييييرة بيني وبين نفسي وقدرت أحط نفسي في إختبارات صعبة قوي ونفسي نجحت في 75% منها ودة بعتبره إنجاز غير متوقع
أينعم أنا مكنتش قاعد في البيت أصلا معظم الوقت بس كنت برتاح قوي في الشوية اللي بقعدهم مع نفسي
الإعتماد على النفس بجد حاجة عظيمة ومن ضمن شوية حاجات جميلة بتحسسك بقيمة نفسك
نصيحة لكل واحد يجرب إنه ينفرد بنفسه علشان يقومها ويهذبها ويخليها يعتمد عليها
أما لو كان خايف من اللي أنا كنت خايف منه قبل الموضوع دة يبقى خليه كدة على طول ومش هيعرف يغير نفسه أبداً
بالمناسبة
التدوينة دي أنا كتبتها وأنا نعسان جدا علشان كدة اللي هيقراها هيحس إنها مش مظبوطة
سامحوني أصلي تعبان جدا

إنت فاكرني هندي !!

الشعب المصري مشهور بخفة الدم ويبطلع أفشات جامدة وتعليقات ظريفة جدا
وكل يوم تلاقي كلمة جديدة ظريفة ولكن يقصد بيها ساعات معنى عكس المعنى تماما
إنهاردة معايا كلمة من الكلمات دي

لما تحب تشتغل واحد وتضحك عليه ويفقسك يقولك : إنت فاكرني هندي !!
هو طبعا عاوز يقول : إنت فاكرني عبيط !!
معنى كدة إن هندي = عبيط .. طبعاً في قاموسه هو
طيب اللي عاوز أقوله بقى إن الهندي العبيط اللي مش عاجبك دة بيفهم أحسن منك

الهند دلوقتي بتطلع شوية مبرمجين في الكمبيوتر ملهمش حل
وكمان الهند عدد سكانها 1000 مليون يعني بليون ومع ذلك مشتكوش من زيادة سكانية
الهند عندها أسلحة نووية وإحنا معندناش
كنت قريت خبر من فترة إن ألمانيا أعطت تأشيرة الدخول لأراضيها لأكثر من 10000 هندي في فترة قليلة قوي
ولما اتسأل المسؤلين : إشمعنة الهنود يعني .. ردو وقالو: إحنا محتاجين مبرمجين .. 10000 دول مبرمجين
دة غير بقى إن الهنود يباخدو أقل أجور على مستوى العالم مع إنهم بشتغلو أضعاف شغلنا
يعني يشتغل طول اليوم ميقولش لا وياخد أقل من نص مرتبك
دة حتى الشحاتين هناك بيدخلو موسوعات جينس في الأرقام القياسية اللي بيحققوها
ميمنعش طبعاً إن فيه سلبيات كتير في الهند زي إنهم لسة بيعبدو البقر لحد دلوقتي مع إن عبادة البقر دي كانت موضة وبطلت من زمان
وكمان أفلامهم فيها مبالغات كتيرة قوي لدرجة إننا من أقولنا بردو المفتكسة إننا لما نقول فيلم هندي معناه إنه كله مبالغات وإنه فيه ناس بتطير وناس بتموت حوالي تلات مرات في الدقيقة ولسة بتفضل عايشة وحتى لو مات بيكمل الفيلم بردو من تحت الأرض وبيقعد يغني نص الفيلم دة غير أصلا إن أطول أفلام في العالم هي الأفلام الهندية
بس بردو رغم كل الحاجات دي فالهند بردو دولة متقدمة عننا وميصحش أبدً أقول كلمة هندي على إنها تريقة

وبدل ما نتريق على غيرنا نبص لنفسنا وإحنا نستكفي تريقة أو يمكن نخلي عندنا دم ونقعد ساكتين

كتاب جامعتنا المحروسة

الصورة اللي فوق دي مش طابور عيش زي ما تخيل بعضكم وإنما دة طابور إستلام الكتب في كلية التجارة بجامعة بني سويف

ولعلمكم الصورة دي بعد ما العملية راقت شوية

دة وضع الكتب عندنا وفي معظم الجامعات الحكومية
الكليات اللي ليها دفعات كبيرة بينزلها الكتاب جاهز على طول وما عليك إلا إنك تقف في طابور طويل زي دة أو تتشعبط فوق زيك زي الناس اللي في الصورة أو ممكن لو إنت ملكش في الزحمة تستنى في الضليلة كام يوم كدة لحد ما الدنيا تروق ولما توصل للشباك يقولك دة الكمية نفذت إستنى كمان شهر
أنا مش فاهم البنات تعمل إيه في الموضوع دة
أما في الكليات ذات الأعداد الصغيرة مثل كليتي المصونة كلية الآداب تلاقي الدكتور مش عارف يتاجر فينا براحته علشان العدد القليل وبالتالي يا إما مش بينزل كتاب يا إما يخلينا نشتري كتاب من السوق يدرس منه يا إما يصورلنا ملزمة يا إما يقضيها محاضرات ومفيش كتب
وبعض الدكاترة .. وبتعمد أقول بعض لأن في دكاترة كتيرة نزيهة ومحترمة ولكن للأسف الأغلبية (……..)
بعض الدكاترة بيسقطو اللي مش بيشتري الكتاب والبعض الآخر يبقولنا لو العدد مكملش عن كذا مش هنزل كتاب وواحد عندنا لسة من كام يوم بيقولنا لو العدد مكملش هفضل أدي محاضرات لحد يوم الإمتحانات
ولو الكتاب نزل بينزل قبل الإمتحان بيومين تلاتة .. طيب نلحق نذاكر إزاي إحنا
وكمان الكتاب يبقى مثلا 500 صفحة وبعدين يلغي منه 300 صفحة !! طيب ما تنزله 200 صفحة من الأول .. ولا يعني علشان تقنعنا بسعر الكتاب
دة غير بقى إن الكتاب نفسه معمول من ورق أزبل من ورق الجرايد وطباعة زي الزفت وصفحات ممسوحة وصفحات ناقصة ومفيش كتاب عندنا عليه العين إلا من رحم ربي
وياريت المضمون كمان اللي فيه بيتفهم .. ماهو إلا دش وكلام متلزق ومش مفهوم وكمان مليان أخطاء إملائية وحاجات متكررة وحاجات ناقصة
بعد دة كله إزاي نقدر نذاكر وننجح
أنا إن شاء الله هبقى أحكي لأولادي القصص دي علشان أوريهم إزاي الواحد كان بيكافح وهو صغير
منتظر تعليقاتكم

يا رب إن عظمت ذنوبي كثرة .. فلقد علمت بأن عفوك أعظم

الموضوع طبعا باين من عنوانه إننا هنتكلم في الدين
بس هو الموضوع مش كدة بالظبط
القصة كلها إن الواحد لما بيختلي بنفسه شوية بيلاقي الأفكار نازله على دماغه زي الفل
وأنا كنت راجع من الجرد الشهري بتاعي في الشركة وسرحت بأفكاري شوية
دماغي سافرت بيا لمناطق كتيرة

كانت منها حتة حلوة قوي وعجبتني قوي إني عرفت أوصلها لوحدي ومش عارف إن كان حد سبقني ليها ولا لا
هي كانت زي ما تقولو كدة إلهام من ربنا عز وجل عليا
القصة وما فيها فكرت في قصة سيدنا إبراهيم اللي جات في القرآن
{وَإِذْ قَالَ إِبْرَاهِيمُ رَبِّ أَرِنِي كَيْفَ تُحْيِـي الْمَوْتَى قَالَ أَوَلَمْ تُؤْمِن قَالَ بَلَى وَلَـكِن لِّيَطْمَئِنَّ قَلْبِي قَالَ فَخُذْ أَرْبَعَةً مِّنَ الطَّيْرِ فَصُرْهُنَّ إِلَيْكَ ثُمَّ اجْعَلْ عَلَى كُلِّ جَبَلٍ مِّنْهُنَّ جُزْءاً ثُمَّ ادْعُهُنَّ يَأْتِينَكَ سَعْياً وَاعْلَمْ أَنَّ اللّهَ عَزِيزٌ حَكِيمٌ}البقرة260
مش عارف ليه تحديداً الآية دي جات على ذهني
يمكن علشان كنا مشغلين قرآن فإفتكرتها
المهم لو ركزنا في الآية هنلاقي إنها بتتكلم عن سيدنا إبرهيم
طيب تعالو نشوف مين سيدنا إبراهيم الأول
1- نبي مرسل
2- أول المسلمين {وَأُمِرْتُ لِأَنْ أَكُونَ أَوَّلَ الْمُسْلِمِينَ }الزمر12
3- أول من أرسل بالحنيفية السمحة
4- أخرجه ربنا من النار سالماً {قُلْنَا يَا نَارُ كُونِي بَرْداً وَسَلَاماً عَلَى إِبْرَاهِيمَ }الأنبياء69
5- كان يكلمه ربه عز وجل
طبعا كلكم عارفين الكلام دة وعاوزين تعرفو دلوقتي أنا عاوز أوصل لإيه
الخمس نقط دول اللي أنا إتكلمت عنهم حصلو كلهم قبل ما سيدنا إبراهيم يسأل ربنا عن كيفية إحياء الموتى
بردو لسة موصلناش
اللي عاوز أقوله إن سيدنا إبراهيم رغم الخمس نقط اللي حصلو دول لسة قلبه مش مطمن وبيسأل ربنا عن كيفية إحياء الموتى
يا الله
أمال إحنا نعمل إيه
آآآآآآآآآآآه .. هي دي بقى النقطة اللي عاوز أوصلها
سيدنا إبراهيم نفسه عاوز قلبه يطمن رغم كل ما حدث له قبل كدة والمهم إنه إتجرأ وسأل ربنا دة
والمهم بقى إن ربنا أجاب له طلبه في الآخر وحدث ما حدث كما ذكرت الآية الكريمة
معنى كدة يا جماعة إننا بجد غلابة قوي
وإننا بجد ربنا بيعزرنا وبيمهلنا لأننا أصلا ضعفاء قوي
{يُرِيدُ اللّهُ أَن يُخَفِّفَ عَنكُمْ وَخُلِقَ الإِنسَانُ ضَعِيفاً }النساء28
ربنا عارف جدا ضعفنا لأنه هو اللي خلقنا وعلشان كدة أجاب طلب سيدنا إبراهيم وخلاه يشوف نموذج بعينه
طيب إحنا مشوفناش نماذج زي دي ولا معجزات ولا ربنا كلمنا ولا شوفنا أنبياء
يبقى أكيد .. أكيد ربنا هيكون رحيم بينا وهيعزرنا ومش هيعذبنا بذنوبنا لأننا غلابة وضعفاء
بس طبعا دة لو بنتوب وبنستغفر
الرسول عليه الصلاة والسلام كن فيه حديث له كان بيقول فيه فيما معناه إن الواحد مننا بخمسين صحابي في الأجر
ياااااااااا الـــــــــــــــلّـــــــــــــــه
الواحد مننا إحنا بخمسين صحابي في الأجر
ودة لأننا في عصر كله فتن وإغراءات ومشاكل
طبعا الصاحبي الواحد أحسن من مليون مننا في العمل إنما إحنا لو إلتزمنا بجد هنكون أكتر منهم في الأجر
طيب كل الكلام دة يا جماعة يدل على إن السكة مفتوحة قصادنا
ربنا بجد هيسامحنا وهيغفرلنا بمتنهى السهولة .. بس إحنا نطلبها منه
فيه سهولة أكتر من كدة
إدعي ربنا وهو هيرد عليك وهيحققلك طلبك
بس إنت ناديه
قوله يا رب أنا غلطان سامحني .. وهو هيسامحك
إنما متعرضش عنه وتقول إنه غفور رحيم
لا .. ماهو بردو عذابه عذاب أليم
نَبِّئْ عِبَادِي أَنِّي أَنَا الْغَفُورُ الرَّحِيمُ{49} وَ أَنَّ عَذَابِي هُوَ الْعَذَابُ الأَلِيمَ{50}-الحجر
ربنا عز وجل عارف اللي إحنا فيه وقد إيه تعبانين
علشان كدة الرسول عليه الصلاة والسلام يبقول حفت الجنة بالمكاره وحفت النار بالشهوات)
يعني اللي يبدوس على نفسه ويعمل الصح هيدخل الجنة واللي هيمشي ورا شهوته هيدخل النار
اللي عاوز أقوله يا جماعة إن ربنا عارف قد إيه إحنا تعبانين وعارف قد إيه إحنا بنحبه ونفسنا نوصله بس الشيطان بيعوقنا .. علشان كدة هو بيقولنا إننا كدة كدة هنرتكب ذنوب بس الشاطر اللي يستغفر قبل ما يفوت الأوان ويتوب لربنا بسرعة
وقصة سيدنا إبراهيم دي هي أكبر دليل على إن ربنا بيعذرنا في اللي إحنا فيه
أنا خلصت كلامي
يا رب إغفرلي وإهديني ويسر لي أمري
نلقاكم على خير في التدوينة الجاية بإذن الله
إدعولي علشان الإمتحانات

إزيك يا مستر .. !!

إتصالات .. شبكة المحمول التالتة في مصر
لو واحد لمّاح دلوقتي هيستغرب وهيقولي : إنت مش موبينيل يبني ؟؟!!
هقوله : آه
هيقولي : الله !! أمال إنت بتعمل دعاية لإتصالات ولا إيه .. دي خيانة !!

هقوله : يا عم متكبرش الموضوع قوي كدة وإستنى أفهمك

إتصالات فتحت شوب ليها في الجامعة عندنا وكانو نازلين بعرض جامد على الخطوط

المهم إني إتعاملت معاهم في شوية حاجات كدة .. أيوة أنا في موبينيل .. بس المرونة إني أدوس مع الباقي ولو في حاجات بسيطة علشان أبقى ملم باللي بيحصل حوليا في المجال
ما عليهم
لما وقفت أشتري من الشوب استرعى انتباهي .. (( هههههه .. حلوة إسترعى إنتباهي دي )) إنهم بينادو بعض بكلمة ((مستر)) بدل من أسمائهم الحقيقية
استغربت .. بس معلقتش علشان مضايقهمش
فكرت يمكن يكون دة مرض ولا حاجة

عدى اليوم وراه يوم وكنت بقف عندهم كتير في الشوب وبدردش معاهم لحد ما أخدت عليهم وسألتهم
: إيه قصة مستر دي
رد عليا واحد منهم وقالي : دي تعليمات من الشركة إنهم أثناء الشغل ينادو بعض باللقب دة طول ماهم في الشركة أو في الشوب أو أثناء الشغل بصفة عامة
قولتله : ودة من إيه دة إن شاء الله !!
قالي : عادي يعني .. دة من باب الرسمية في التعامل
بيني وبينكم .. مستلطفتش القصة في الأول
بس لما قلّبتها في دماغي شوية فهمتها
هو عاوز يقول إن لما ينادو بعض بالألقاب الرسمية دة بيدي جدية في الشغل
إنما لو نادو بعض بأسماهم .. هتترفع الكلفة ما بينهم وتبقى القعدة بدل ما هي قعدة شغل تبقة قعدة أصحاب مع بعضيهم وبيتسلّو
أنا فعلا مقتنع جدا إن الشغل لازم يبقى كله جد مفيش هزار .. ولو عاوز أهزر مع حد بشتغل معاه .. يكون برة نطاق الشغل
وأنا أصلا هزاري غبي ودايما بعك مع الناس علشان كدة المفروض أنا تحديدا مهزرش مع حد
ومع ذلك .. أنا بهزر مع كل الناس وفي أي وقت

المهم
إستفادة إنهاردة تتلخص في جملة (( وقت الشغل .. إنسى كل ماعداه ))
نلقاكم في تدوينة جديدة
سلاحف

عبّر أهلي يا أخي "تقدير الذات"

يا قهلا يا قهلا
كيفكم وكيف أخباركم
إنهاردة فكرت أتكلم في حاجة مهمة شوية أو مهمة كتير
تقدير الذات
لكن أنا مش هتكلم على تقدير الذات من منطلق النفس إنما هتكلم عن تقديرها من الغير

هل إحنا بنعيش بتقدير الناس لينا ؟؟
هل لو محدش قدرنا مش هنعرف نعيش وهنفضل زعلانين ؟
الواقع .. أو من خلال تجربتي الشخصية (( طبعا كل الكلام اللي في المدونة أفكاريالشخصية ومفيش مشاكل أبدا إنها تتعارض مع أفكار تانية )) إن تقدير الذات من الناس مهم نسبيا
تعالو نشرح
لما كنت في ثانوية عامة كان أهلي بيزهقوني في موضوع المذاكرة
ذااااااااكر … ذااااااااااااااااااكر
كأنهم بينوموني تنويم تغتاطيسي
طول الوقت بيأمروني إني أذاكر وأنا أصلا كاره المذاكرة خلقة .. فبالكم بقى لما حد يفضل يزن فوق دماغك إنك تعمل حاجة إنت مش بتحبها
دة أنا لو بحبها هكرها بسبب الزن
ما عليهم
المهم إني في مرة والدي كان عمال يقولي بردو على المذاكرة
قولتلو : طيب يا بابا بدل ما انتو عمالين تقولو ذاكر عمال على بطال .. ما تشجعوني على المذاكرة زي كل الأبهات والأمهات ما بتعمل
قام ضحك بسخرية كدة وقالي : أشجعك إزاي يعني .. أسقفلك .. أهوه (( وقعد يصقف بإيده )) .. هييييييييه ..هيييييييييه .. ياللا أي خدمة .. ذاكر بقى .. وقعد يضحك
قولتله يا بابا أنا بتكلم عن تشجيع الأهل لأولادهم زي عرض مكافأة ليهم لما مثلا الأب يقول لإبنه لو نجحت هجيبلك عجلة ولا حتى كاوتش واحد
سكت ومتكلمش تاني
خلاصة الموقف
أنا كنت طول الوقت ببقى قاعد في أوضتي وقافل عليا وقاعد بتهبب على عيني وبذاكر .. ورغم إني بذاكر لنفسي مش لحد بس بردو كنت محتاج تشجيع .. إنما لما أقعد أذاكر دة كله وفي النهاية لو قمت أريح خمس دقايق يقولو إني مكنتش بذاكر .. دة يبقى حرام إنهم ميقدروش تعبي
هنا ندخل في حتة التقدير
أي حد بيعمل أي حاجة .. هو من جواه بيقول إنها من غير مقابل
بس والله العظيم لازم يبقى فيه مقابل بيبقى عاوزه .. بس هو مش واخد باله منه
والمقابل دة يتمثل في مكسب ذاتي معين .. وإرضاء حاجة معينة جواه
مش معنى كدة إنه مش بيعمل الحاجة لله في لله .. هو فعلا من جواه بيقول إنها من غير مقابل .. بس في العقل الباطن اللي بيحركه علشان يعمل الحاجة دي إنه عاوز يثبت وجوده ((مثلا)) من خلال العمل دة
علشان كدة تلاقي الناس المتطوعين في عمل خيري مثلا .. بيحسو بسعادة لا مثيل لها .. رغم إنهم مش كسبانين حاجة .. بس كسبو حاجة أغلى من جواهم
ورغم إنهم بردو بيقولو إنهم مش منتظرين تقدير حد إلا إنهم لما بيجي التقدير دة بيبقو فرحانين قوي .. ودة لأنهم عاوزين التقدير بس لو قالو انهم عاوزينو الناس هتتهمهم إن

عملو العمل علشان تقدير الناس
أنا واثق إن قليل قوي اللي هيوافقني على كلامي .. بس دي وجهة نظري
محدش بيعمل حاجة لله في لله 100%
حتى العبادة .. ربنا بيقول عن أنبياءه (( إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَباً

وَرَهَباً وَكَانُوا لَنَا خَاشِعِينَ ))الأنبياء90
يعني كانو بيعبدو ربنا رغبة في جنته وخوفا من ناره
أما الصوفية اللي هيقولو إن لازم تحب ربنا بس كدة حتى لو دخلك النار فكلامهم مخالف لكلام ربنا نفسه .. إلا بقى لو شافو نفسهم أحسن من أنبياء ربنا

في الشركات الكبيرة والعالمية .. تقدير الموظفين عندهم مهم جدا علشان الشغل يمشي لأن العامل اللي مش متقدر شغله بيطلع مش حلو إنما طول ما مجهوده الواضح رؤساءه بيشكروه عليه وبيقدرولو تعبه .. سعادته النفسية نتيجة التقدير هتخرج بوضوح في العمل اللي بيعمله
الرسول عليه الصلاة والسلام بيقول ( إعط الأجير أجره قبل أن يجف عرقه .)
ولو عملنا تشبيه كدة بالحديث الشريف والحاجة اللي بنتكلم عنها هنلاقي إن الأجر هنا يوازي التقدير

الخلاصة

تقدير الذات مهم جدا من الآخرين ..
من جوانا بنسعى علشانه
لو مقولناش عاوزينه بنبقى من جوانا هنموت عليه
لو مجاش بجد هنزعل وهيأثر على الحاجة اللي بنعملها

كلمة

شكرا .. كلمة بسيطة .. تأثيرها عالي قوي لما بتطلع صادقة من القلب

نداء

كل واحد ليه حد بيحبه وبيعمل أي حاجة علشانه .. لازم يجري عليه وياخده في حضنه تقديرا ليه

عالماشي

يااااااااااااااااااه الواحد نسي شكل المدونة من كتر ماهو مش بيدخلها
إزيكم يا جماعة
وحشتوني جدا جدا جدا
انا عندي امتحان كمان اربع ساعات من لحظة الكتابة دي
بس حبيت أدخل أقول إني فرحان قوي
مفيش وقت أتكلم علشان ألحق أراجعلي كلمتين ينفعوني في الإمتحان
بس عاوز أقول حاجة بسرعة عالماشي كدة
مفيش أحلى من إنك تلاقي حد يحبك ويفهمك ويعيش عمره كله ليك
يحققلك رغباتك ويحافظ عليك
يبيع الدنيا علشان لمسة إيديك
وهمه كل همه إنه يرضيك
أنا مش بحاول أقول شعر بس بحاول أوصف اللي جوايا
يا رب سعادتي تدوم لفترة طويلة
ويارب يهنيني بحبي لنهاية عمري
قولو آمين
وإن شاء الله تخلص الإمتحانات ونرجع ندون تاني
إدعولي