تسألني

تسألني من أنا وليتني كنت أعرف
ماكنت مكثت هنا ومن العذاب كنت أهرب
تسألني أين الطريق وسط الظلام الموحش
وليت النور يسطع ويضئ عقلا يرقب
آمال وأحلام تمناها الفتى صغيراً
لم يكن ينظر ولا يعرف ولا يدرك
فلو كان يتأمل قليلاً
ما مكث في التيه طويلاً
ولا بحياته كان أذنب
تسألني إلى متى
سيظل الحال هكذا
وإلام على حظنا نندب
ما سر الهالة السوداء
المحيطة بالأبناء
من هذا الجيل المتعب
تسألني وليتني
أحمل لأسلئتك جواباً
يطفئ لهيبا مضرم
لكني آسفاً مثلك
في ظلمات الجهل أترقب
أملاً ولو زائفاً
سهماً ولو حائراً
يعطي لأسئلتك رداً
وأنا مازلت حياً
قبلما الأنفاس تنضب

كسوف الضائعين

من جديد حزين .. وليس بجديد
من جديد ضائع .. وليس بجديد
منتصف الطريق يعج بالضائعين
وأنا بينهم .. أخ أكيد
شارد العين شارد الفكر
بين ظلمات الهموم
أتلمس لمحاً من الأمل
على خيوط الضوء المسموم
وقت الكسوف والكل شاخص بصره
لا يعون ولا يدركون
غير أنه الضوء .. ولكن
أتاهم ما يحرق العيون
ضوء ملعون
أضاع حياتهم .. ومضى في سكون
تاركا وراءه آلاف المذهولين
فيما ظنو انه الأمل .. ولكن ضلو إلى حين
فتحت عيني ..هل أرى ؟؟
رأيت .. وليتني لم أرى
رأيت أشباحا من الورى
في الغمام يمشون
في الضياع يتقلبون
يبحثون عن أغلى ما يملكون
غارقون .. في غيابات الهموم
ضائعون .. حالي وحال وآخرون
أطرقت رأسي حزينا
هذا عذابا أليما
بربك .. ماذا هم فاعلون ؟؟
وماذا أفعل لهم ؟؟
وأنا أصلا بينهم
في الألم مشتركون
ليتنا لم نتبع الخيط
ليتنا لم نترك البيت
لعلنا بقينا سالمين
ربي بك نستغيث
ارحمنا و أشدد أزرنا
ناديناك يا مغيث
كن معنا وفك أسرنا
يارب أزل همومنا
وفرج كربنا
وحقق آمالنا
ولا تلجأنا لغيرك يا رب العالمين
اللهم آمين

حب إمتلاك

جنات
جنات جنات جنات
جنات المطربة
مطربة مطربة مطربة
قالت كلام حلو قوي
قوي قوي قوي قوي قوي
قالت ايييييييييه
مش فاكر
بس هو كلام حلو يعني
كانت بتتكلم عن حب الإمتلاك
وقعدت كدة قالت كلام صعب وشديد وقوي
ووحش وكلب وحمار
وقعدت تقول انه ضحك عليها وبتاع
وبعد ما غدر بيها طلع كان بيحبها حب إمتلاك
طبعا لأنها جنات
فسمعنا الكلام واتأثرنا
وهي صعبت علينا قوي
وقعدنا نعيطلها قد كدة
ولو ان لما الواحد يعيد التفكير في الموضوع يلاقيه مش بالطريقة دي يعني
يعني ايه حب امتلاك
انه يحبها بس لمجرد انه يمتلكها مش حاجة غير كدة
الكلام دة مش صح خالص
حب إمتلاك يعني لما حد يحب حد … ومن كتر حبه فيه .. بيبقى عاوزه ليه هو بس
مش عاوز حد يشاركه في حبيبه
ولو بكلمة
ولو بنظرة
مش عاوز حد يشوفوه او يكلمه غيره
عاوزه يبقى بتاعه هو بس
وأكيد الطرف التاني لو بيحبه بنفس المقدار هيبقى نفس الكلام بالنسبة ليه
فبيبقى الحب حب إمتلاك
عاوز يمتلكه كله من كتر حبه ليه
والكلام دة للطرفين
إنما يكون حب الإمتلاك مشكلة لو كان من طرف واحد
وساعتها بقى تبقو اسمعو اغنية جنات وعيطو جنبها لأن هيبقى عندها حق ساعتها
بس مبدأ حب الإمتلاك مش غلط
ومش أنانية
لأنه هيكون متبادل
وهو عموما الحب كله حاجات غريبة وعجيبة
ومكنش حد قالك تحب من الأول بقى

وسط الضباب

إتكلمت في تدوينة سابقة عن أصعب إحساس وهو الحيرة
وشرحت انك لما تكون على مفترق الطرق وكل الطرق متساوية لأن طريقك اللي كنت عاوزه اتهد خلاص
وساعتها الحيرة قوية لأن كل الطرق متساوية

ويا إما تختار أي طريق وخلاص يا إما تفضل واقف مكانك إلى مالا نهاية
http://www.yakyblog.com/?p=44
دة كان أصعب إحساس بالنسبة لي وقتها
مكنتش عارف إني ممكت أحس بأصعب منه
بقالي كام يوم عايش في حالة إنهيار تام (ودي أقل كلمة أقدر أوصف بيها حالتي)
من تاني رجعت على مفترق الطرق
بس المرة دي بصورة أقوى من الأول
أقوى بمراحل
والسبب إن الطرق اللي انت على مفترقها دي كنت قبل كدة شايفها
إنما المرة دي لا
ضباب كتير قوي حوليك مخليك مش عارف تشوف أي حاجة
والكارثة إنك محتار من الأول وانت شايف .. بالك بقى انك محتار وكمان مش شايف
وعلى فكرة
الضباب دة اتضح انه موجود من زمان قوي بس أنا اللي كنت مغمض عيني ومش عاوز أشوفه
وأديني فتحت وشوفته
بس بعد فوات الأوان
فيه حاجات مش ينفع تتصلح غير انك ترجع بالزمن ومتعملهاش أساسا
فيه جروح مهما داوتها هتفضل مفتوحة ولو لمت هتسيب أثر كأنها لسة معمولة
بكرة  .. كلمة غامضة قوي
يا ترى بكرة شايلي إيه

عيش ندل .. تموت مرتاح البال

قالو في المثل المستفز “عيش جبان تموت مستور”
فيه مثل جديد على وزنه
عيش ندل .. تموت مرتاح البال
ودة ببساطة لأن الندل معندوش ضمير يتعبه
مش بيقعد آخر يومه يفكر هو عمل كدة ليه
قلبه مش بيوجعه لما بيشوف نتيجه عمله الأسود
مش بيأنب نفسه على حاجة
مش بيحمل نفسه تعب ومشقة الإلتزام بكلامه
طبعا أنا تعليقي هنا ساخر
بس أنا في مرة قولت لنفسي
هو أنا ليه مطلعتش ندل
كنت هتمتع بالمميزات دي كلها
أصل أكتر الحاجات اللي تعباني دلوقتي هي نفسها الحاجات اللي مش بتتعب الندل
وأنا لو كنت ندل كان زماني مرتاح
الحمد لله إني مش ندل والحمد لله على كل حال
دعواتكم معانا

نظرية النسبية (بتاعتي انا مش بتاعة أينشتاين)

اللي هقولو دلوقتي حاجة قديمة جدا وكله عارفها
بس أنا أخدت وقت عقبال ما تذوقتها وحسيت معناها الحقيقي
أنا قولت قبل كدة إني بكتب هنا خبراتي الشخصية
ومن ثم هقول اللي جاي أقوله
الثابت الوحيد في الدنيا دي هو ربنا
ربنا هو المطلق الوحيد والثابت الوحيد وكل ما عداه فهو متغير
اللي شوفته بنفسي ان مفيش حاجة ثابتة في الدنيا
مادية كانت او معنوية
فيما أسميه بنظرية النسبية
كل حاجة في الدنيا موجودة بنسب
كل بني آدم فينا فيه كل حاجة بنسب
أنا مليان صفات وأخلاق حلوة وكويسة وبنت حلال
ومليان بردو بصفات سيئة وقبيحة وبنت كلب
الحلو والوحش نسبي
متقدرش تقول إن الحاجة دي صح أو غلط طول الوقت
ساعات كتير بيبقى الصح غلط والغلط صح
وكمان مش كل الناس بتجمع ان الحاجة دي صح ومش كل الناس بتجمع انها غلط
دة حتى الحلال والحرام بيبقى فيه استثناءات
القتل حرام .. بس لو دفاع عن النفس حلال
السرقة حرام .. بس سيدنا عمر مأقمش الحد على اللي سرق من الجوع
نصوص القرآن ثابتة لأنها من صفات الله
ولكن فهمها من البشر متفاوت .. فمادام دخل البشر في الحاجة بقت نسبية
فهمنا مش واحد .. علشان كدة حكمنا على أي حاجة بيبقى نسبي
العادات والتقاليد بتختلف من مكان للتاني
الصح والغلط بيختلف من مكان للتاني
كل حاجة في الدنيا متغيرة ومش ثابتة
علشان كدة مفيش حاجة إسمها مستحيل في الزمن دة إلا ما تعارض مع قدرة وإرادة الله عز وجل
لأن ببساطة مهما وصلنا ومهم روحنا وجينا إحنا مخلوقات وربنا هو المطلق الوحيد الذي لا ولن يتغير
ومن ثم
محدش يقول على حاجة انها مستحيل تحصل
محدش يقول ان فولان عمره ما هيتغير
محدش يقول على بكرة ان هيحصل كذا لأن الأمور مش زي ما إحنا شايفينها
مفيش قرارات ثابتة
مفيش مبادئ ثابتة
كله مع الوقت بيتغير وبيتبدل
ومن تاني هقول .. إوعى تقول مستحيل .. مع الوقت ممكن تحصل .. ومفيش حاجة بعيدة على ربنا

الحب والإرتباط (الإتنين مختلفين على فكرة)

بيقولو ان الحب مكتسب
وان مع العشرة يأتي الحب
وأكتر الناس اللي بتقول كدة بيبقول بيقولها تحديدا في جوازة الصالونات
لما البنت تقول مش بحبه
يقولولها مع الوقت هتحبيه والحب هيجي مع العشرة
أنا بقى رأي مختلف
الحب حاجة والعشرة حاجة
كلامهم صح مبدئيا في ان فيه حاجة بتيجي مع العشرة
إنما الحاجة دي مش حب
قد نطلق عليها مجازا كلمة حب
إنما هو مش حب
أنا بسميه إرتباط .. تعلق .. تعود ..
حاجة زي كدة
إنما الحب في نظري أنا حاجة تانية خالص
الحب مش مكتسب .. الحب هبة
الحب منحة .. الحب عطية
الحب بيجي لوحده .. محدش بيجيبه
الحب بيخلي القلب يختار .. مش العقل
في الحالات التانية اللي ذكرتها سابقا هي اللي بيختارها العقل فعلا
العشرة بتخلي الست تقتنع ان الراجل دة كويس فبتقول انها بتحبه لأنها مع الوقت إتعودت عليه وارتبط بيه واصبح وجدوه ضروري جدا بالنسبة ليها
علشان كدة بتقول مجازاً إنها بتحبه .. إنما هي ارتبطت بيه مش بتحبه
الحب كمشاعر حاجة ملهاش تحكم .. بينما الإرتباط ليه تحكم
لأن القلب مش بيفكر (وهو الحاكم للحب)
بينما العقل بيفكر (وهو الحاكم للإرتباط)
الحب مش بيتنسي مهما حصل
الإرتباط ممكن يتنسي مع الوقت
أصلهم زي ما أخدو فترة عقبال ما يرتبطو ببعض .. مش محتاجين غير فترة قدها علشان ينسو بعض
عمليا الإرتباط أفضل من الحب .. علشان كدة جوازات الصالونات ناجحة أكتر من الجواز عن حب
عمليا بردو الحب طعمه أحلى بكتيييييييييير من الإرتباط .. بس جروحه قاسية قوي ومش بتروح وحتى لو خفت بتسيب أثر كبير
ومعظم المحبين حاليا لأنهم مش واخدين بالهم من حقيقة الحب فبيرتكبو أخطاء قاتلة بإسم الحب وهما ممكن أساسا يكونو عايشين إرتباط وليس حب
باقي إني أقول إن كلمة حب هنا أقصد بيها الحب بين أي إتنين .. مش بس بين ولد وبنت .. إنما الحب اللي في الصداقة وحب الأهل وحب أي حاجة في أي إتجاه
ومحدش يقولي إن حب الأهل بالفطرة لأن فيه ناس مش بتحب أهلها بالكليّة
أنا متذكر إن كلمة الحب خرجت مني بصدق شديد في حياتي كلها ( وأنا عندي 22 سنة دلوقتي ) مرتين بس
أرجع وأقول إن الكلام دة مش أكتر من وجهة نظري ورغم إيماني الشديد بها إلا أنها تحتمل الصواب والخطأ زيها زي أي تدوينة من تدويناتي

إركب الموجة

في الغالب بيبقى المقصود من الكلمة دي إنك تتخلى عن مبادئك الحالية وتساير الشكل الحالي
وانا مش بعيد قوي عن المعنى دة بس في نقطة تانية
أوقات كتيرة بتواجهنا مشاكل
بيتهيألي طول الوقت
فيه مشاكل بنحلها
ومشاكل تانية حلها الوحيد انها تتساب للزمن يحلها
كتير مننا عنده الإصرار إنه يفضل ورا المشكلة لحد ما يحلها
ودة مش عيب في حد ذاته بل وعلى العكس تماما
إنما اللي أقصده
إن أوقات بتواجهنا عدد كتير من المشاكل في نفس الوقت
ونقعد نحارب في المشاكل دي
لحد ما الواحد بيتعب وكل قواه بتستنفذ
ولما تكون منهك بالشكل دة وتواجهك مشكلة تانية مش من العقل إنك تواجها
إنما سايرها
إمشي معاها
سيبها توديك مطرح ما توديك
أنا بشبه الموضوع بحاجة كدة
كأنك كنت راكب شفينة وغرقت
وانت في وسط البحر
والأمواج حولك من كل اتجاه
وانت عمال تصارع الأمواج وتسبح يمين وشمال
لو فضلت على الوضع دة كتير هتغرق
لأنك أكيد هتتعب من كتر مصارعة الأمواج وهتنهك قواك ومش هتعرف تحرك دراعك علشان يخرجك من قلب البحر
ساعتها أنسب حل إنك تسيب نفسك خالص للموجة
وخصوصا إن الموج بيحدف لبرة مش لجوة
وساعتها هتروح لبر الأمان
الخلاصة
مش كل مشكلة تواجهنا لازم نعافر فيها ونحلها بالشكل اللي احنا عاوزينه
كتير قوي بيبقى حل المشاكل دي بيبقى بشكل مختلف عن تخيلنا وتصورنا
وبالتالي ممكن تتحل المشكلة في ثواني ونفضل مقتنعين انها متحلتش ونعافر فيها من تاني
خد الأمور ببساطة وسيبها على الله
وإركب الموجه بدل ما تصارعها

ما بلاش نتكلم في الماضي

كلمة بليغة قالها عمرو دياب في أغنيته “ما بلاش نتكلم في الماضي
الماضي حاجة وماتت خلاص .. والكلام فيها مش بيفيد إنما بيفتح الجروح القديمة
إيه لزمة إننا نتكلم في مشكلة فاتت وخلصت ؟؟
مفيش أي فايدة
بالعكس
مجرد إنك تفتكر مشكلة حصلت من زمان ورغم انها ماتت إلا ان الإحساس اللي كان عندك وقتها بيرجع تاني وبالتالي نفسيتك بتتعب
في أغنية تانية لعمرو دياب بردو قال
“قالتلي قول حبيتها ولا محبتهاش مردتش أرد .. قالتلي قول قولتلها بلاش حبيبتي بلاش”
لكن هي فضلت بردو مصرة وهو يقولها
“دي حكاية وخلصت مش عارف هتفيدنا بإيه .. دي حكاية وعدت ونسيتها فاكراها ليه”
إنما بردو بنت اللذينة مسبتوش في حاله
“حلفت لأقول وياريتني قولت .. محبتهاش”
طبعا هو بيندم إنه قال الحقيقة .. ليه بقى ؟؟ .. علشان اللي جاي
“أول ما قلت بعيني كنت بحبها .. حسيت كأن الكلمة جرحت قلبها”
شوفتو .. لا وكمان
“قالتلي كمل .. قلت أكمل ايه بقى .. أنا قلت ايه ازي قلبي جرحتها”
وطلع هو اللي غلطان في الآخر
أنا مش فاهم .. ليه دايما وخصوصا البنات بتحب تفتح في المواضيع القديمة اللي مش بتجيب غير بس المشاكل ووجع القلب
حاجة تغيظ بجد
نصيحة أخوية .. اللي فات مات .. وبلاش نتكلم في الماضي

أخد وعطا

مش عارف إذا كان الكلام دة قولتو قبل كدة ولا لا

بس في الحالتين لازم أقولو تاني

أي علاقة في الدنيا بين أي أشخاص

مهما كان نوعها

مهما كانت درجتها

مادام دخل فيها كلمة حب

لازم العلاقة تكون متوازنة

والتوازن هنا هو مقدار كل حاجة خارجة وداخلة

التضحيات والتنازلات

الأفعال والأقوال

المشاعر والأحاسيس

لازم كل الكلام دة يتوزع بنسب متساوية لكل طرف

لو طرف بيضحي أكتر من طرف

لو طرف طول الوقت بيدي بس ومش بياخد او بيدي أكتر ما بياخد

لو طرف بياخد اكتر ما بيدي

مهما كان حب الطرف اللي انتقص من حقه

لازم هيجي يوم وهيجيب آخره

وساعتها هتكون مرحلة نهاية العلاقة

مهما كان الطرفين بيحبو بعض

مادام مفيش توازن

تبقى علاقة محكوم عليها بالفشل

الحب أخد وعطا

والأخد لازم يكون قد العطا

لو أخدت بنسبة 30% وعطيت بنسبة 70%

لازم المرة الجاية يبقى أخدك 70% وعطائك 30% علشان تعوض الفرق

وبعدها لازم تساوي كل مرة 50% أخد و50% عطا

ولو حبك طغا على كرامتك وشخصيتك

وغيرك للأسوأ

طلع قلبك من مكانه وحطه في برطمان

وقدر عقلك اللي غيبته وأهملته

إتأسفله وقولو يسامحك

وأطلب منه ميتخلاش عنك

ولو نخيت وقبلت بإن قلبك يسوقك ويلغي التساوي في نسب الأخد والعطا

تبقى قابلني لو فلحت

ولو حصل هديك عنوان تربتي علشان تيجي تعمل اللي عاوزه فوقيها

مين يتغير ؟؟

سؤال طرحته على نفسي في مرة لما لقيت الأخت زيزي عادل المطربة الجامدة واللي أنا عن نفسي بحب صوتها وأغانيها قوي .. بتقول في أغنية (وعد عليا)

مش قادر تصبر شوية وتحاول تانى تغير فيا
انا كنت صحيح عندية بس من جوايا حباك
فاكرها سهلة عليا القاك بقيت كده مش ليا
دى صعبة ومش حاجة عادية انى اعيش من غير هواك
وعد عليا اتغير بس عشان ارضيك
انا هتغير يمكن ترجع واحلى فى عنيك
انا من بعدك تاهت منى فرحتى بيك
ياحبيبى سامحنى خلاص
مش هاخد وقت كبير دى عيوبى ماهيش كتير
انا نفسى تشوفنى اوام زى ما حلمت عنيك

عجبتني الكلمات قوي لما ركزت فيها ولكن التركيز دة خلى السؤال دة ينطرح ليه الست هي اللي المفروض انها تتغير علشان الراجل وليه العكس مش اللي يحصل ؟
ليه دايما لما واحد وواحدة يرتبطو أول حاجة يطلبها منها إنها تتغير علشانه
مع انهم ممكن يكونو عارفين بعض كأصحاب في الأول ومش بيكلمها على التغيير إنما أول ما الموضوع بقى علاقة وإرتباط وحب فبقى بيطالبها بالتغيير
حاولت ألاقي سبب للموضوع وبعدين ملقيتش
بس فيه عندي شبه إجابة .. وهي إن الراجل المفروض هو صاحب القوامة في الزواج .. والمفروض برضو ان العلاقة دي ينتج عنها زواج لو علاقة شريفة
إذن بما إن الراجل ليه القوامة فبالتالي مش هو اللي هيتغير إنما الطرف التاني هو اللي يتغير
والقوامة هي القيادة ودي متوفرة في الراجل بسبب مقومات طبيعية ربنا خلقها في الراجل مش موجودة في الست وناتج كمان عن خبرات الرجل اللي بيكتسبها في حياته أكتر من الست وكل الحاجات دي بتأهله للقيادة ومن ثم لو غير الحاجات اللي بتأهله للقيادة ساعتها هيتحول لشخص يقاد وليس يقود
الست بقى لأنها خرجت برة البيت فأصبح لها خبرات شوية وساعات بتبقى متعارضة مع خبرات الراجل .. ولكن لأن القيادة ليه هو فبالتالي لازم كلمة واحدة تمشي لأن المركب اللي فيها ريسين تغرق وبالتالي لازم هي اللي تتغير
وأنا مش أقصد بكلامي إن كلمة الراجل اللي تمشي إن الست ملهاش رأي وإنما أقصد الكلمة النهائية
إنما الست لازم تتشاور مع الراجل وتبدي رأيها وتقنعه .. والستات ليهم طرق رهيبة في إقناع الرجال بكل اللي عاوزينه
إذن خلاصة الموضوع إن القوامة (القيادة) للراجل وبالتالي مينفعش يغير نفسه ويتجرد من صفات القيادة وإنما لازم هي اللي تتغير وتمشي بدماغه
ولازم هنا نتكلم عن نقطة إنه لازم يتغير هو لو فيه صفات سلبية تتنافى مع صفات القائد زي عدم الجدية وعدم الإيجابية وعدم تحمل المسؤولية
والست لما تتغير مش تتغير للأوحش إنما للأحسن
دة رأي وأتمنى إنه يتفهم صح وأتمنى ألاقي نقاش جيد حوله

Bad Mood

حالة أخرى من حالات اللاشيئ اللي الواحد فيها مش عارف الحاجة اللي مش عارفها او اللي عارفها ولو انه يعرف هتبقى زي ماهو مش يعرف ولو معرفش زي ما عرف وكل حاجة ملهاش او ليها علاقة بكل او جزء من حاجة وبالتالي الوجود مع اللاوجود أصبح شئ من اللاشيئ ومنه نخرج بحاجة كبيرة قوي وعظيمة قوي وهي إننا مش عارفين إيه اللي المفروض نعرفه أو نعمله وساعتها الواحد يموت او يعيش حتى دي مش عارف أنهو أحسن
وكان نتاج الحالة دي كلام مش مفهوم للبعض وإن كان تعبير عن حاجة مش مفهومة بردو ومش عارف هل ممكن تتفهم يوم ولا لا
إعذروني

كل الناس اللي عاشت هتموت

بس مش كل الناس اللي ماتت عاشت

أنا عشت قبل ما أتولد وعشت بعد ما متّ

إنما عمري ما عشت وأنا عايش

أنا الإحساس اللي ماشي على رجلين

أكلت وشربت الحب اللي مدقتوش

عشت بأمنية وبأغنية عنه

دورت عليه .. بس ملقتوش

يا ريت لو حد لقاه يدلني عليه

يمكن ألحق أعيشه يوم قبل ما أموت

ربنا يخليهالك يا بيه وتتجوزو

القطط الشحاتة

 

ظاهرة غريبة جدا شدتني وانا في ألكس آخر مرتين روحت فيهم

كل ما أمشي خطوتين على الكورنيش ألاقي قطتين تلاتة جربانين وفروتهم معفنة ومتقطعة وناقص خلاص أشوف رقعة على جلدهم

الغريب إن القطط دي دايرة تشحت من الناس زي شحاتين البشر تمام

وماشيين تحديدا على نهج شحاتين الكورنيش في مقولة (ربنا يخليهالك يا أستاذ وتتجوزو)

جربو تمشو على الكورنيش وإنتو تلاقوهم قاعدين ملقحين يمين وشمال

وبيتلزقو لكل إتنين زوجين couple قاعدين على الكورنيش ويقعدو يتمسحو فيهم علشان يرمولهم أي أكل

ويا ويلك بقى لو انت قاعد بتاكل قصادهم علنا كدة .. هيبهدلوك

أنا قبل ما أفهم اللي فيها .. كنت فاكرهم قطط عادية يعني .. قبل ما أعرف إنهم شحاتين .. آل إيه إتجننت في عقلي وأخطأت بحق نفسي وحق الشعوب وروحت مبسبس لقطة فيهم .. ولقيت القطة اللي بسبستلها هجمت عليا هي وعشر قطط تانية معرفش ظهرو منين وقعدو يتمسحو فيا وينونولي وفاكريني معايا أكل

أنا طبعا هربت منهم لأني مش معايا أي حاجة

وكأي شحاتين محترمين بيبقى ليهم ناس بيشفقو عليهم ويجيبلهم دعم (أكل) من وقت للتاني

وقد قامت عدسة محمود أخويا يإلتقاط هذه الصورة المعبرة .. كانت واحدة عجوزة جايبة أكل للقطط ورميتها على الرصيف وفجأة ظهرت كمية غريبة من القطط كما هو واضح بالصورة .. وكمان الصورة مش جايبة كل حاجة

المهم إن القطط دي هل يا ترى عايشة من زمان على الكورنيش ولا هي عدت مع حفر الأنفاق ولا إيه قصتها

معرفش عموما بس أنا حبيت أنقلكم اللي شوفته

الخال والعم

مرة وأنا صغير واحد صاحبي لاعبني لعبة مفترض إنها لعبة ذكاء كانت عبارة عن الشكل دة

والمطلوب إني لو مزنوق في النص بين دول أقدر أهرب من أنهو جهة فيهم

أنا جاوبت وقولت : خال

الواد قالي : يبن اللذينة عرفت إزاي

قولتله : أصل خالي بحبه أكتر من عمي وعمتي وإبن عمي فلو روحتله هيسيبني أعدي !!

طبعا الواد مكنش دة قصده خالص إنما كان يقصد إن كلمة خال معناها فاضي (خالي = فاضي)

أنا بقى لأن أختي أول من إتجوز في إخواتي علشان كدة أنا خال من فترة طويلة إنما من وقت قريب أخويا إتجوز وربنا رزقه بولد وبكدة أصبحت كمان عم

إبن أخويا عنده دلوقتي حوالي شهرين وأنا شوفته مرتين بس

ودة بسبب إني مش بحب أروح لأخويا كتير علشان أنا كراجل وجودي في البيت يخلي مراته لازم تبقى لابسة بالكامل وكمان تقعد جوة أساسا والبيت مش هبيقى على بعضه كله ودة لأن فيه واحدة ست مش هتعرف تاخد راحتها وراجل أجنبي عنها موجود

إنما على العكس لو روحت انا عند أختي

أختي هتقعد قصادي بشعرها عادي وبأي لبس لأني أخوها وطول عمري بشوفها كدة من قبل ما تتجوز ودة عادي ومش حرام

ومن ثم أنا بروح عند أختي أكتر بكتيييييييييير من ما بروح لأخويا ولو فكرت أحسبها هقول إن مرواحي لأخويا بالنسبة لمرواحي لأختي يساوي 1 : 40 يعني كل زيارة لأخويا قصادها 40 زيارة

الخلاصة اللي عاوز أخرج بيها من الكلام دة إيه

اللي شرحته دة مش بس بالنسبة لي إنما دة تقريبا الطبيعي واللي بيحصل مع معظم الناس كلها

ومعظم الناس بردو خالهم أقرب ليهم من عمهم

والسبب وضح هنا لما لقينا إني بروح لأختي أختر وبالتالي أنا كخال أنجح من كعم لأني مش بدخل بيت أخويا كتير

بس كدة

وهي دي بقى قصة حياتي