بحبك
وفي سياق آخر .. بعشقك
غير إني أوقات تانية
ومن شدة تعبي .. بتعبك
وفي سياق آخر
روحي بتتوه وتحتار
بين نارك وجنتك
الجنة وعارفها .. بس النار
بعدي عن لحظات
مش موجودة فيها حضرتك
وفي سياق آخر
لما تنزل دمعتك
وانتي بعيد وإيدي
مش طايلة وجنتك
يكون العذاب أضعاف
وبإنصاف .. مش غلطتك
الغلط مني
لما عرفت إني
بحبك ..وسبتك
تبكي
وفي سياق آخر
بكيت بقلب منهك
مكلوم .. موجوع .. مكسور
بينهج
وقفلت حضن مفتوح
وسلسلته .. وجنزرته
وربطته ولفيت بيه الشوارع
معدش نافع
والسبب مش عندك
لكني شخص مختلف
وفي سياق آخر
مجنون
عاوز يلف الكون
في سيجارة
ويولعها ويطفيها في بحر أسود
زي قلبه الأسود
اتولد كدة .. مرتبك
كان بيخاف يحب
بس شافك فحبك
وخاف تاني ليسيبك
من خوفه عليكي
ولجل حبه ليكي ثار
وفار بركانه لما في لحظة شك
انه مش هيقدر يحميكي
اعذريه .. دة بيحبك
وفي سياق آخر .. بيعشقك
صدقيه لما يقولك
إنه ساب الكون عشانك
وجالك
بقلب مقفول على إسمك
ولو طالك
تترسم حياته برسمك
ولو طلبتي خاتم على قلبه
او "ليو" بيلعب على حجره
تكون أحلامك أوامر
ولو غامر
بس يحقق حلمك
متصدقيش لو قالك انه بيحبك
أصله .. وفي سياق آخر
بيعبدك
