وسط الضباب

إتكلمت في تدوينة سابقة عن أصعب إحساس وهو الحيرة
وشرحت انك لما تكون على مفترق الطرق وكل الطرق متساوية لأن طريقك اللي كنت عاوزه اتهد خلاص
وساعتها الحيرة قوية لأن كل الطرق متساوية

ويا إما تختار أي طريق وخلاص يا إما تفضل واقف مكانك إلى مالا نهاية
http://www.yakyblog.com/?p=44
دة كان أصعب إحساس بالنسبة لي وقتها
مكنتش عارف إني ممكت أحس بأصعب منه
بقالي كام يوم عايش في حالة إنهيار تام (ودي أقل كلمة أقدر أوصف بيها حالتي)
من تاني رجعت على مفترق الطرق
بس المرة دي بصورة أقوى من الأول
أقوى بمراحل
والسبب إن الطرق اللي انت على مفترقها دي كنت قبل كدة شايفها
إنما المرة دي لا
ضباب كتير قوي حوليك مخليك مش عارف تشوف أي حاجة
والكارثة إنك محتار من الأول وانت شايف .. بالك بقى انك محتار وكمان مش شايف
وعلى فكرة
الضباب دة اتضح انه موجود من زمان قوي بس أنا اللي كنت مغمض عيني ومش عاوز أشوفه
وأديني فتحت وشوفته
بس بعد فوات الأوان
فيه حاجات مش ينفع تتصلح غير انك ترجع بالزمن ومتعملهاش أساسا
فيه جروح مهما داوتها هتفضل مفتوحة ولو لمت هتسيب أثر كأنها لسة معمولة
بكرة  .. كلمة غامضة قوي
يا ترى بكرة شايلي إيه

عيش ندل .. تموت مرتاح البال

قالو في المثل المستفز “عيش جبان تموت مستور”
فيه مثل جديد على وزنه
عيش ندل .. تموت مرتاح البال
ودة ببساطة لأن الندل معندوش ضمير يتعبه
مش بيقعد آخر يومه يفكر هو عمل كدة ليه
قلبه مش بيوجعه لما بيشوف نتيجه عمله الأسود
مش بيأنب نفسه على حاجة
مش بيحمل نفسه تعب ومشقة الإلتزام بكلامه
طبعا أنا تعليقي هنا ساخر
بس أنا في مرة قولت لنفسي
هو أنا ليه مطلعتش ندل
كنت هتمتع بالمميزات دي كلها
أصل أكتر الحاجات اللي تعباني دلوقتي هي نفسها الحاجات اللي مش بتتعب الندل
وأنا لو كنت ندل كان زماني مرتاح
الحمد لله إني مش ندل والحمد لله على كل حال
دعواتكم معانا

نظرية النسبية (بتاعتي انا مش بتاعة أينشتاين)

اللي هقولو دلوقتي حاجة قديمة جدا وكله عارفها
بس أنا أخدت وقت عقبال ما تذوقتها وحسيت معناها الحقيقي
أنا قولت قبل كدة إني بكتب هنا خبراتي الشخصية
ومن ثم هقول اللي جاي أقوله
الثابت الوحيد في الدنيا دي هو ربنا
ربنا هو المطلق الوحيد والثابت الوحيد وكل ما عداه فهو متغير
اللي شوفته بنفسي ان مفيش حاجة ثابتة في الدنيا
مادية كانت او معنوية
فيما أسميه بنظرية النسبية
كل حاجة في الدنيا موجودة بنسب
كل بني آدم فينا فيه كل حاجة بنسب
أنا مليان صفات وأخلاق حلوة وكويسة وبنت حلال
ومليان بردو بصفات سيئة وقبيحة وبنت كلب
الحلو والوحش نسبي
متقدرش تقول إن الحاجة دي صح أو غلط طول الوقت
ساعات كتير بيبقى الصح غلط والغلط صح
وكمان مش كل الناس بتجمع ان الحاجة دي صح ومش كل الناس بتجمع انها غلط
دة حتى الحلال والحرام بيبقى فيه استثناءات
القتل حرام .. بس لو دفاع عن النفس حلال
السرقة حرام .. بس سيدنا عمر مأقمش الحد على اللي سرق من الجوع
نصوص القرآن ثابتة لأنها من صفات الله
ولكن فهمها من البشر متفاوت .. فمادام دخل البشر في الحاجة بقت نسبية
فهمنا مش واحد .. علشان كدة حكمنا على أي حاجة بيبقى نسبي
العادات والتقاليد بتختلف من مكان للتاني
الصح والغلط بيختلف من مكان للتاني
كل حاجة في الدنيا متغيرة ومش ثابتة
علشان كدة مفيش حاجة إسمها مستحيل في الزمن دة إلا ما تعارض مع قدرة وإرادة الله عز وجل
لأن ببساطة مهما وصلنا ومهم روحنا وجينا إحنا مخلوقات وربنا هو المطلق الوحيد الذي لا ولن يتغير
ومن ثم
محدش يقول على حاجة انها مستحيل تحصل
محدش يقول ان فولان عمره ما هيتغير
محدش يقول على بكرة ان هيحصل كذا لأن الأمور مش زي ما إحنا شايفينها
مفيش قرارات ثابتة
مفيش مبادئ ثابتة
كله مع الوقت بيتغير وبيتبدل
ومن تاني هقول .. إوعى تقول مستحيل .. مع الوقت ممكن تحصل .. ومفيش حاجة بعيدة على ربنا

الحب والإرتباط (الإتنين مختلفين على فكرة)

بيقولو ان الحب مكتسب
وان مع العشرة يأتي الحب
وأكتر الناس اللي بتقول كدة بيبقول بيقولها تحديدا في جوازة الصالونات
لما البنت تقول مش بحبه
يقولولها مع الوقت هتحبيه والحب هيجي مع العشرة
أنا بقى رأي مختلف
الحب حاجة والعشرة حاجة
كلامهم صح مبدئيا في ان فيه حاجة بتيجي مع العشرة
إنما الحاجة دي مش حب
قد نطلق عليها مجازا كلمة حب
إنما هو مش حب
أنا بسميه إرتباط .. تعلق .. تعود ..
حاجة زي كدة
إنما الحب في نظري أنا حاجة تانية خالص
الحب مش مكتسب .. الحب هبة
الحب منحة .. الحب عطية
الحب بيجي لوحده .. محدش بيجيبه
الحب بيخلي القلب يختار .. مش العقل
في الحالات التانية اللي ذكرتها سابقا هي اللي بيختارها العقل فعلا
العشرة بتخلي الست تقتنع ان الراجل دة كويس فبتقول انها بتحبه لأنها مع الوقت إتعودت عليه وارتبط بيه واصبح وجدوه ضروري جدا بالنسبة ليها
علشان كدة بتقول مجازاً إنها بتحبه .. إنما هي ارتبطت بيه مش بتحبه
الحب كمشاعر حاجة ملهاش تحكم .. بينما الإرتباط ليه تحكم
لأن القلب مش بيفكر (وهو الحاكم للحب)
بينما العقل بيفكر (وهو الحاكم للإرتباط)
الحب مش بيتنسي مهما حصل
الإرتباط ممكن يتنسي مع الوقت
أصلهم زي ما أخدو فترة عقبال ما يرتبطو ببعض .. مش محتاجين غير فترة قدها علشان ينسو بعض
عمليا الإرتباط أفضل من الحب .. علشان كدة جوازات الصالونات ناجحة أكتر من الجواز عن حب
عمليا بردو الحب طعمه أحلى بكتيييييييييير من الإرتباط .. بس جروحه قاسية قوي ومش بتروح وحتى لو خفت بتسيب أثر كبير
ومعظم المحبين حاليا لأنهم مش واخدين بالهم من حقيقة الحب فبيرتكبو أخطاء قاتلة بإسم الحب وهما ممكن أساسا يكونو عايشين إرتباط وليس حب
باقي إني أقول إن كلمة حب هنا أقصد بيها الحب بين أي إتنين .. مش بس بين ولد وبنت .. إنما الحب اللي في الصداقة وحب الأهل وحب أي حاجة في أي إتجاه
ومحدش يقولي إن حب الأهل بالفطرة لأن فيه ناس مش بتحب أهلها بالكليّة
أنا متذكر إن كلمة الحب خرجت مني بصدق شديد في حياتي كلها ( وأنا عندي 22 سنة دلوقتي ) مرتين بس
أرجع وأقول إن الكلام دة مش أكتر من وجهة نظري ورغم إيماني الشديد بها إلا أنها تحتمل الصواب والخطأ زيها زي أي تدوينة من تدويناتي