عنيكي

في عينيكي .. سال الكلام دموع
بالمشاعر مشحون
بيقولي كلام
كان بالنسبالي أحلام
وحتى الأحلام
مكنتش ممكنة
ولا الدموع
ولا الأوهام
دة القلب كان صامت مشجون
بالهم مقتول
والفرحة بالنسباله أسطورة
بتحكي عن عنقاء
وبتول
والعدرا في مخدعها بتبكي
وسامعة الكلام والقول
وأنا واقف على باب المغارة
مستنيكي
عشان أمسح دمعة عنيكي
وآخدها في منديلي
آآآآآآآآآآآآآآآآآآه
آه يا عذرائي
ياللي منديلك حياتي
خدش حيائي
خلاني أتنفس هواكي
وأنشر هدومي على جفونك
تنشفها نظرة عنيكي
وعنيكي .. لسة بتحكي
وبتلبسني الهدوم
مع إن العري فيها فضيلة
مش حب في ضلمة
ولا اتنين في حظيرة
لكن الحب في قلبك أمان
من أقربهم ليا
ومن اللي خان
وشفايفك بتبوس إديا
مش إستهوان
ولكن الحب غالب
وغالي
وبالإمكان أكون في حضنك
وبالإمكان .. أخطف روحك
ولكن روحي في روحك متعلقة
إزاي أسيب بيوت
بالأزهار متزوقة
يا عشقي العاشق لكياني
يا درة أكواني
يا شمس الشموس المشرقة
يا روح الروح الحاضرة .. الغائبة
تراني مستنيكي
مع إنك جوايا
مش قادر أقول
ولا أشكي إليكي
ولكن .. على سبيل الغواية
برمشلك بعيوني
وعيوني ليكي مشتاقة
والغربة حراقة
وكلامي مش موزون
لكنه مفهوم
وانتي فاهماني
وعنيكي حساني
وقلبك قالب كياني
إمتى تيجي من تاني
أمسح دمعة عينكي
وأغرقك في حناني
وحناني إيه جنب حنانك
دة لو قلبي كائن عاقل
مكنش فكر وسابك
ولكن الفكر لقلبي عيبة
والكلام غيبة
آآآآآآآآآآآآآآآآآآآآآآه
خلص الكلام
وفضلت دموع عنيكي
المرة دي آخر دمعة
هستقبلها على خدي
وأبلعها
وألمس إديكي
وأبوسها
وأخدك في حضني
وأتوه
في مجرات الكون العاشق
واللي في عنيكي
كوّن كواكبه وشموسه
واللي لو وهبني نص قوته
هتظل مجراتي كلها
في عنيكي
بحبك