شجرة

أوقات .. حياتنا بتبتسم
وأوقات بريشة بتترسم
وفي القلب شجرة مايلة
بتمد فروعها بالخير
بضلاية سمرا تحمي عجوز
من لسعة شمس
والفراشة حواليه طايرة
بجمالها تسحره
وبألوانها تبهره
ولسة الريشة دايرة بترسم
ولسة العجوز قاعد تحت الشجرة
مستمتع بالضل وبالخضرة
نام العجوز
صحي وسط الليل على صوت خربشة
آخخخخخ الوقت أخر .. والدنيا مغبشة
والليل فارس
وفارش ملايته السودا عالمكان
والعجوز قلقان
لا شايف صحرا ولا بستان
والخربشة بتقرب كمان وكمان
طيب يعمل إيه والصحة عالقد
لو طلع ان الصوت دة أسد
يطلع يجري .. لا مش ممكن
او يستنى ويشوف ايه هيحصل
فجأة ظهر ديب كبير
على الأرض بيدوس
وماشي ناحية العجوز
ووراه ديابة كتير
بتلمع عنيهم في الضلمة
والنيه أكيد باينة
عاوزين يكلوه
مات العجوز مليون مرة
وهو لسة عايش
للأسف عايش
على عكس ما تمنى
في اللحظة الصعبة دية
الديب الكبير قرب
ومجهز مخالبه وأنيابه
ووراه عيلته وأصحابه
ووصلو عند العجوز
المستسلم لمصيره الواضح
وبسبب عجزه الفاضح
قرر يتاكل في صمت
ورمى نفسه عالأرض
وفي لحظة فارقة
دبت الحياه في الشجرة
ومالت الفروع  الخارقة

تلسع الديابة
وضربت عنيها الخلابة
واتفرقت الجموع
وصوتهم مسموع
والعجوز لسة عالأرض
ولما الوقت عدى
رفع راسه .. وإتخض
الديابة جرت
وأنا لسة عايش
مفهمش اللي حصل
ولا همه اللي كان
المهم انه حاسس
بالحياه من جديد
وبالفرحة .. والحنان
وجوة القلب شجرة
حمت عجوز غلبان
ولسة الريشة دايرة
بترسم بالألوان
قصة عايشة في قلبي

وكان يا مكان