حمرا

في جسمي ملايين من كرات الدم الحمرا
كورة منهم كانت متمردة .. مكنتش بتحب تمشي مع باقي الكرات
في مرة انسحبت من قطيع الكرات ومشت في وريد مختلف عن مسار باقي القطيع
راحت الكورة مشت في الوريد مسافرة طويلة .. في الطريق اتخبطت في كورة غريبة .. لا هي حمرا ولا هي بيضا .. كانت سودا .. سودا غامق بعيد عنكم .. الكورة الحمرا كانت فضولية قوي .. راحت قربت منها رغم شكلها المخيف .. وسألتها : إنتي مين .. بصت الكورا السودا وقالتلها .. وانتي مال أهلك .. الكورا الحمرا مؤدبة .. حافظت على هدوئها وقالتلها .. عادي يا برنس أنا بس لقيتك في المنطقة قولت أتعرف .. الكورا السودا هديت شوية وقالتلها : أنا نيكوتين .. الكورة الحمرا مش فاهمة .. يعني ايه نيكوتين ولامؤاخذة .. ضحكت الكورا السودا .. قالت : النيكوتين ولامؤاخذة دة مادة مسممة الناس بتلفها في صوابع وتولع فيها وتشرب دخانها .. الكورا الحمرا مستغربة ودة من ايه يعني .. ردت الكورا السودا .. وانا مالي يختي .. سيبيهم يعملو اللي عاوزينو .. وراحت نفخت في وشها .. الكورا الحمرا قعدت تكح كتير .. قالتلها ايه دة .. ردت السودا .. هو دة النيكوتين نيهاهاهاهاهاهاهاهاهاها
بعدت الكورا الحمرا وهي مش فاهمة حاجة .. لكن حست انها تعبت بسبب النيكوتين جامد

كملت مشوارها وراحت مكان جديد .. وصلت لمكان كبيييييييييير قوي ومعقد قوي .. كله طرق متشابكة .. ومش مفهومة  .. وهناك قابلت كورا بني .. قالتلها : صباح الفل على عيونك ..هو انتي مين يا أختي .. الكورة البني قالت : يوه .. ينيلك .. انتي ومش واخدة بالك مني ولا إيه .. ردت عليها : لا والنبي يا أختي .. أنا لسة مبتدئة ..قالتلها : أنا بتاعة المزاج .. انا الحشيش .. الكورة الحمرا بردو مش فاهمة .. يعني إيه حشيش يختي ..ردت : دة حاجة كدة الناس بتلفها في صوابع وتشرب دخانها ..الكورة الحمرا مستغربة : هو ايه قصة الحاجات اللي الناس بتحرقها وتشرب دخانها دي .. ضحكت الكورة البني ضحكة رقيعة وراحت نفخت في وشها .. الكورا الحمرا فجأة دماغها تقلت قوي وفضلت ماشية تطوح .

كملت مشوارها وهي مش حاسة بنفسها خالص .. لحد ما وصلت لبيت كبييييييييييييييير .. من أربع أوض .. قعدت تخبط على الباب .. محدش بيفتح .. سألت الكور الحمرا اللي في المكان ..هو دة ايه يا جدعان .. قالولها : دة بيت ملك لأميرة .. قعدت فيه شوية .. وهجرته ..ومن ساعتها محدش سكنه تاني .. فضلت الكورا الحمرا واقفة .. البيت شكله من البيوت القديمة اللي اتعملت بمزاج ..لكن بسبب الهجر عششت عليه العناكب .. وملاه التراب .

نطت الكورا الحمرا من الشباك ودخلت البيت عشان تتفرج عليه من جوة .. لقيته فااااااااااضييييييييييييي .. استغربت ازاي كان حد ساكنه وهو كدة .. وعرفت بعد كدة ان الأميرة بعد ما هجرت البيت ..صاحب البيت رمى حاجتها في الزبالة ..لأنها مصانتش البيت كويس ..فضلت ماشية جوة البيت .. شكله حلو قوي .. ازاي البيت دة يتساب .. أكيد الأميرة دي كانت هبلة ..فجأة البيت نور .. وفجأة لقيت ناس كتيرة قوي جوة البيت .. وكل واحد دخل معاه حاجة .. اللي معاه كرسي واللي معاه ترابيزة واللي معاه نجفة واللي معاه لوح فنية .. وفي لحظة البيت اتفرش من جديد .. اشتغلت موسيقى هادية .. وفاحت ريحة عطر جميلة .. فرحت الكورة الحمرا .. وحست بإنتعاش .

فجأة .. دقت الساعة .. اكتشفت الكورة انها اتأخرت كتير عن ميعادها .. طلعت تجري برة البيت لحد ما دخلت في شريان .. ووصلت مكانها القديم .. ولما حكت لأصحابها عن مغامرتها .. قالولها .. حمدلله عالسلامة .. دي لسة أول تجربة ليكي ..لكن طول مانتي في الجسم دة .. هتلفي كتييييييير قوي 

:)