من جديد .. البداية

أنا ..أيوة أنا
مش عارف أبدأ إزاي
بس فيه فترات كتيرة عدت في حياتي وكلها مختلفة جدا عن بعض وان كان فيه رابط خفي بيربطها كلها ببعض
أنا آدم ..مصطفى سعيد ..ياكي
أنا ابن أبويا ..وإبن إلهي وإبن الإنسان
أنا اللي حبيت واتحبيت .. وجرحت وانجرحت
أنا اللي سافرت واتغربت .. وفي غربتي لقيت موطني
أنا المؤمن وأنا الملحد وأنا اللي حب الحياه وكرهها
أنا الواثق وأنا المتردد .. أنا الشايف وأنا الأعمى
أنا الشاعر وأنا الحالم ..أنا المفكر والمثقف والجاهل
أنا الإنسان وأنا البني آدم ..وأنا الحيوان الناطق .. والأخرس
أنا البداية ..وأنا النهاية
وأديني ببدأ بداية جديدة .. من بدايات كتير
مش عارف المرة دي النهاية هتكون امتى ..بس المرة دي مش هفكر في نهاية
كان عندي مدونة واتقفلت  ..وكان عندي كلام راح
اللي هعمله دلوقتي إني هنقل اللي هقدر عليه هنا
وهرجع أكتب من تاني
هرجع أكب من دماغي في ورق إلكتروني
استحملوني شوية .. انا مجرد مسافر في الحياه