في المبتدى
ببدأ يومي بالبسمة
وأتمشى حافي عالرملة
يرمي البحر شباكه
توقعني موجة عالية
فاسأل نفسي
العيب في البجر .. ولا فيا ؟؟
وأنشف هدومي وأقوم
توقعني موجة تانية
ويتكرر السؤال جوايا
ونظرات البحر ليا
ساكتة ومش بتجاوب
مالك يا بحر عاند ؟؟
وليه رسولك الموج
بيحاربني وأنا مسالم ؟؟
وماشي مآمن
-------
يا بحر دة أنا موجوع
وبقاوح وبقول مكمل
يضربني موجك المسروع
لإمتى هقدر اتحمل ؟؟
بشكيلك يا بحر موجك
والرغوة على خدودك
دة الحلم ما يخلا منك
وكل يوم بنزلّك
أشكيلك يا بحر حالي
وأنعم بجلوسي قربك
دة الهم شاغل بالي
وبهرب وباجي جنبك
يا بحر ليه بتقسى ؟؟
دة أنا مش قادر أنسى
وجيتلك شايل همومي
تنسفلي ميت مرسى !!
قولي يا بحر مالك ؟؟
وإيه اللي جرالك ؟؟
جرب وأنا هسمعك
يمكن أقدر أسعدك
----------
اييييييه يا مسكين
صُعب عليا حالك
هحكيلك وأريح بالك
أنا هنا بقالي كتير
ملايين السنين
وشوفت حاجات ياما
متخطرش في خيالك
صراعات حيوانات
صراعات بني آدمين
وياما حويت ناس
ياما شفيت ناس
وما لقيت منهم
غير عدم الإحساس
كله بيجي يحكي
كله بيجي يشكي
ويمشو مرتاحين
وأشيل الألم وحدي
ملاقي حد قربي
بالغدر مليانين
شيلت على قد ما وسعت
وريحت على قد ما ريحت
لكن الضغط طال
وإني أشكي ... محال !!
وياريتني في مرة أنطق
وأقول إكتفيت
ما بيدي غير الموج رسول
بيني وبين البشر .. يحول
ما بدي أسمع تاني
حكاياتهم تاعباني
وأنا بتعبي .. مليت
--------
روح يابن آدم
شوفلك حضن غيري
وسيبني هنا في حالي
كافي شري خيري
الحال يروح محال
والهم صال وجال
وما يحويك غير
قبر في الوحال
راح يسمعك ليوم الدين
والخلق عنك مشغولين
وقتها بس تعرف
إن العمر أقصر
وان الكون أكبر
من أي سمع
ومن أي وجع
جميله وخيالك حلو. جميل انك تشارك الكل همومه حتى البحر (الحال يروح محال
ردحذفوالهم صال وجال
وما يحويك غير
قبر في الوحال
راح يسمعك ليوم الدين
والخلق عنك مشغولين) حقيقيه اوى ده